Rusiye Mudafaa nazirligi Ukrainanıñ sıñrları yanında apansızdan öz ordularını teşkerip başlağanı ve istilâ etilgen Qırımğa arbiy bölükler yollağanı aqqında haber etti. Bunı iyünniñ 5-nde, Rusiye Mudafaa nazirliginiñ beyanatına atıf etip, «UNİAN» ukrain haber agentlibi bildirdi.
Rusiyeniñ Cenübiy arbiy bölüginiñ komandanı Aleksandr Dvornikovnıñ emirinen bir sıra bölük birlikleri, arbiy azırlıqlarınıñ teşkerilmesi içün, telüke işaretinen tursatılğanı haber etile. Qırımda yerleşken motoatıcı birlikler ve qomşu Rusiyeniñ bir-qaç regionı: Dağıstan, Çeçenistan, Cenubiy Osetiya, Rostov vilâyeti ve Krasnodar elindeki birlikler teşkerüvge celp etildi.
Mudafaa nazirliginiñ bildirüvnde: «Cenübiy arbiy bölüginiñ birlikleri, arbiy azırlıq teşkerüvlerine celp etilip, kelmeleri kerek olğan yerlerde toplaştı ve işke keçmege azırlar. Birinci kün devamında vaqıt şartları, em de devamalı bulunğan yerlerinde ve avuşuvlar vaqıtında vazife eda etmege azırlıqları teşkerildi», – dep aytıla.
Cemi sayıda, tank, motoatıcı, ağır silâlar bölüklerinden em de Rusiyeniñ Qara deñiz flotı ve Hazar flotiliyası deñiz piyade bölüklerinden 6,5 biñden ziyade asker ve tahminen 1,5 biñ arbiy ve mahsus tehnika maşnası ameliy idmanlarğa celp etilgeni qayd etile.
