Link açıqlığı

Mahsus Qırım.Aqiqat içün

Qaradağnıñ Pobjeda adlı gazetası öz oquycılarına devletniñ yolbaşçıları yani baş nazir, parlament spikeri ve Qaradağnıñ NATOğa kirmesine qol tutqan bütün deputatlar olaraq, Rusiyeniñ qara cedveline kirgeni aqqında bildire. Haber, pek tesirli siyasetçi olğan deputat Miodrag Vukoviçniñ Rusiyege kirmesi yasaqlanıp, keri Qarabağqa sürgün etilgeninden soñ dercetildi. Vukoviçke pek qaba davranıp, ona on saat qılınğanlar. O, özü bile rusiyeli uquq qoruyıcılarını «insaniyetsiz» ve namussız dep adlandırğan, albu ki aynı zamanda Rusiye tarafdarı olğan muhalefet firqalı Qaradağ deputatları Moskvada pek sıcaq qarşılanğan.

Aslında Moskva Qaradağda derc etilgen malümatqa izaat bermey ve «qara cedvelni» aşıkâr etmek niyetinde degil ve Podgoritsadakilerniñ ekseriyeti, basılğanından malümat kerçek olğanından şubelenmey. Qaradağ kerçekten de NATOğa kirmesi mumkün olacağı aqqında belli olıp, Rusiye Aq deñizdeki salahiyetli limanlarını coyacağını farq etken soñ, Rusiye hususiy hızmetleri, tabir caiz ise, «aqlını oynatqan edi». Qaradağ uquq qoruyıcıları devlet avdarması yapmakta, atta sabıq baş nazir Milo Cukanoviçke qarşı suiqast azırlanmasında rusiyeli keşifçi ve olarnıñ Qaradağ içindeki agentlerini şekleyler. Kiriş yasağı bunen qıyaslanğanda – qabaatsız bir eglence kibi olıp körüne.

Qaradağnıñ vaziyeti ne yerde ise, Ukrainanıñ alını añdıra. Daa yaqın keçmişteki «qardaş ülke» tecavuz qurbanına aylândı. Qaradağda memuriy binalarnı elge keçirmek vastasınen teşkil etilgen devlet avdarması neticesiz bitti – lâkin o da, söz kelimi, Qırımda olğan aynı bir şekilde, ukrain topraqlarını zapt etüvde iştirak etken insanlarnı celp etüv yolunen azırlana edi. Eger Qaradağ devlet avdarması muvafaqiyetnen bitken olsa edi, onı Qırımdaki avdarmanen qıyaslamaq mumkün olur edi, çünki eki yerdeki parlamentlerniñ deputataları Rusiye silâlı diversantlarınıñ zorluğı altında Kreml içün muim olğan qararlarğa rey bermege mecbur qalacaq ediler.

Qardaşlıq ve qullıqnı qarıştırmaq – Rusiye özüniñ tış siyasetinde qullanğan eñ sevimli üslübidir

Meger, qarışuv vastasınen yapılğan «menfaatlarnıñ ilerilemesi» boğulıp başlasa, «cezalavnıñ» yañı deviri başlay eken. Ukrain siyasetçilerine nisbeten cinaiy işler açılaraq, Arseniy Yatsenük çeçen cenkinde iştirak etti denilgeni kibi, aqılğa yatmaycaq qabaatlavlar tapıla. Qaradağ siyasetçileri Taqiqat komştetiniñ nişanına aylânmadılar amma, artıq olarnı toplu olaraq Rusiyege kirsetmeyler.

Ancaq ukrainler ve qaradağlılarnı, olarnı yalıñız Kremlniñ ıncıtqanı birleştirmemektedir. Olarda da, bularda da daa tünevin «qardaş» ve rusiyelilerge eñ yaqın olğan Avropa halqları ola ediler. «Qardaşlar» Kremlge qarşı söz aytıp, öz yolunı saylâğan andan itibaren, şu arada duşmanğa çevirildiler.

Qardaşlıq ve qullıqnı qarıştırmaq – Rusiye özüniñ tış siyasetinde qullanğan eñ sevimli üslübidir.

Vitaliy Portnikov, jurnalist ve siyasiy izaatçı, Radio Svoboda közeticisi

«Fikir» rubrikasında bildirilgen fikir-tüşünceler müelliflerniñ noqtaiy nazarını aks ettirip, muarririyetniñ baqışlarınen bir olmaması mumkün

XS
SM
MD
LG