Link açıqlığı

Saatnıñ esas haberi

Qırımlı advokat Semedlâyevniñ ömür arqadaşı: bergi hızmetiniñ hadimleri evimizni fotoresimge çekmege istedi


Qırımlı advokat Edem Semedlâyevniñ ömür arqadaşı Qırım.Aqiqatqa iyünniñ 5-nde Rusiye bergi hızmetiniñ Qırımdaki temsilcileri, olranıñ evine kelip fotoresim çekmege istegenlerini ayttı. Rusiye hızmetleriniñ malümatına köre, advokatnıñ ailesi yaşağan evde bir musafirhane yerleşe eken.

«Bergi hızmeti yolbaşçısınıñ avalesinen kelip, kassa aparatlarını baqacaq oldılar. Bizde iç bir vaqıt olmağan şahsiy musafirhaneni baqmaq içün keldiler. Tam adresini bilmey ediler. Evimizni resimge çekmege istediler. Men olarğa izin bermedim. Azbarımızdan çıqmağa rica ettim ve bir de bir şeylerni resimge çekmege isteseler, ferman ketirip, protokol tizmek kerek olğanlarını ayttım. Olar dediler ki, olarnıñ fermanı yoq, sadece yolbaşçınıñ avalesi bar. Avale üzerinde iç bir tarih yoq edi, adres añlaşılmay edi», – dedi Elvina Semedlâyeva.

Onıñ sözlerine köre, bergiciler israr etti, evge kirmege istep, politsiya çağırttıracaqlarınen qorquttılar, amma soñra «advokat kelip olarğa er şeyni añlattı ve olar dağılıp ketti», – dedi o.

İyünniñ 5-nde qırımlı advokat Emil Kurbedinov, onıñ işdeşi Edem Semedlâyevniñ evine belli olmağan adamlar kirmege istegenlerini haber etken edi.

Semedlâyev Qırımda siyasiy davalarnen oğraşqan ileri advokatlardan biri sayıla.

Rusiye Qırımnı işğal etken soñ yarımadada mustaqil jurnalistler, cemaat failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, qırımtatar Milliy areket failleri, Meclis azalarınıñ evlerinde tintüvler sıqlaştı.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG