Qırımlı advokat Edem Semedlâyevniñ evine belli olmağan adamlar kirmege tırışa. Bunı iyünniñ 5-nde öz Facebook saifesinde başqa advokat Emil Kurbedinov haber etti.
«Edem Semedlâyev iş ziyaretinen ketkenini beklegen soñ, özlerini bergi hızmetiniñ hadimleri olaraq tanıtıp, evine kirmege tırışa. Evinde ömür arqadaşı ve dört balası bar», – dep yazdı Kurbedinov.
Rusiye uquq qoruv organları bu adiseni izaatlamay. Qırım.Aqiqat vaziyetniñ tafsilâtını ögrenmege tırışa.
Semedlâyev Qırımda siyasiy davalarnen oğraşqan ileri advokatlardan biri sayıla. Martnıñ soñunda Rusiye Taqiqat komitetiniñ Qırımdaki idaresi, bir sıra davada qırımtatarlarnıñ aqqlarını qorçalağan advokat Emil Kurbedinovnı körüşüvge çağırttırğan edi.
Rusiye Qırımnı işğal etken soñ yarımadada mustaqil jurnalistler, cemaat failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, qırımtatar Milliy areket failleri, Meclis azalarınıñ evlerinde tintüvler sıqlaştı.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
