İnsan aqları boyunca Avropa mahkemesi (YESPÇ) işğal altındaki Qırımda insan aqlarını bozğanı içün Ukrainanıñ Rusiyege qarşı açqan ilk davasındaki uquqiy yerine tanıdı. Bu aqta iyünniñ 1-nde Kyivde keçken matbuat konferentsiyasında Ukraina adalet naziri Pavel Petrenko söz yürsetti.
Adalet naziri bunı «yahşı haber» dep adlandırdı.
«Bizler, Ukraina olaraq, insan aqları boyunca Avropa mahkemesiniñ ilk davanı baqmağa aqqı yoq demesi boyunca Rusiyeniñ yalan üstüne qurulğan izaatlarını qaralaycaq isbat ve delillernen beraber uquqiy pozitsiyamıznı taqdim etecegimizni ilân etken edik. İnsan aqları boyunca Avropa mahkemesi «Ukraina Rusiyege qarşı» ilk davası boyunca Qırımda insan aqlarını bozğanı aqqındaki deliller hususındaki bizim uquqiy pozitsiyamıznı resmiy olaraq tasdıqladı», – dedi Petrenko.
Ukraina insan aqları boyunca Avropa mahkemesine Rusiyeniñ Qırımda ve Kyiv nezaret etip olamağan Donbass territoriyalarındaki areketlerinen bağlı beş dane dava açqan edi.
Aprelniñ 19-nda OON (BMT) «Ukraina Rusiyege qarşı» davası çerçivesinde işğal altındaki Qırım sakinlerini qorçalamaq maqsadınen muvaqqat tedbirler kirsetmege razı olğan edi. Mahkeme ukrainlerniñ aqlarına tiklenmesi mumkün olmaycaq derecede zarar ketirilgen delillernen bağlı qarar qabul etken edi.
Mahkeme yekün qara qabul etilgence Rusiyeni, qırımtatar halqınıñ aqlarına zarar ketirmemesine, şu cumleden Meclisniñ faaliyetini tekrar canlandırmasına, ondan da ğayrı işğal altındaki yarımadada ukrain tilinde tasil berilmesini teminlemege mecbur etken edi.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
