Cumaaqşamı künü, iyünniñ 1-nde, Kremlniñ nezareindeki Qırım Yuqarı mahkemesiniñ nevbetteki toplaşuvında «Çiygoznıñ davasında» şaat olaraq keçken şahıslar ifade berdi. Olar 2014 senesi fevralniñ 26-nda ötkerilgen mitingniñ iştirakçileri mabus tarafından qanunsız areketlerge çağırılmağanlarını ayttı. Bunı mahkeme toplaşusvınıñ birinci qısımından soñ advokat Nikolay Polozov tarif etti.
«Şaat kördi ki, Rusiye tarafdarları Ukraina tarafını tutqan miting iştirakçilerinden bayraqlarnı tutıp almağa tırışa edi ve atta eñ azından bir bayraqnı tutıp alğan ediler. Şaat Ahtem Çiygoznı körgen edi, o merasimniñ başında kelip selâmlaşqan edi, lâkin şaat Ahtem Çiygoznıñ bir de bir tecavuziy areketlerge çağırğanını, qanunsız areket yapqanını körmedi», – dedi advokat.
İmaye tarafınıñ ekinci şaatı Bağçasaray regional meclisiniñ azası olğanını ayttı, lâkin vaqia arfesinde Çiygoz onnen bağlanmağanını, iç bir toplaşuv ötkermegenini dedi.
«Fevralniñ 26-nda saba o (şaat – QA) öz dostı Ervin İbragimovnen beraber, o şimdiki vaqıtta esir etilgen ve alâ daa tapılmağan ve Rus akimiyeti onı tapmaq içün iç bir tedbir almay, Aqmescitke yol alğan edi. Yuqarı Şura binası yanına kelgende kördi ki, Ukrainanıñ topraq bütünligine destek bildirmek içün ötkerilgen mitingten ğayrı, başqa siyasiy fikirlernen daa bir kütleviy merasim ötkerile eken – bu Rusiye tarafdarlarınıñ mitingi edi, olar içteki azbarnıñ sağ tarafında yerleşken edi», – degen şaatnıñ sözlerini Polozov aytıp berdi.
Teneffüsten soñ mahkeme toplaşuvı devam etecektir.
Ahtem Çıygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ territorial bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.
«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.
