Link açıqlığı

Rusiye Qırımğa 60 biñge yaqın arbiy ketirdi – ekspert


İşğal etilgen Qırımğa qomşu Rusiyeden ketirilgen 60 biñge yaqın arbiy bulunmaqta. Bu aqta mayısnıñ 30-nda «Mayda inostrannıh del» fondınıñ eksperti Ukrlife.TV kanalına bergen intervyusında söz yürsetti.

«SSCB devrinde Qırımda miqdar olaraq 140 biñge yaqın arbiy mevcut edi. Bizim tahminlerimizge köre, şimdiki künde Qırımda 60 biñge yaqın arbiy bar. Rusiye akimiyeti ta 2014 senesi bildirgenine köre, olar Qırımda yerleşecek arbiyler miqdarını 100-120 biñge yetkizmek niyetinde», dep ayttı Smelânskiy.

2017 senesi mart ayınıñ soñunda Ukraina Yuqarı Radasınıñ yolbaşçısı Andrey Parubiy «Ukraina-Poloniya-Litva» Parlamaenterara assambleyasınıñ toplaşuvında Rusiye yarımadada özek silâ yerleştirmek içün Qırımnıñ arbiy infrastrukturasını azırlay, hususan, sovyetler devrinden qalğan özek silâ ambarlarını tamir etip, modernizatsiya yapmaqta degen edi.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG