Link açıqlığı

Qırım SİZOsında yatqan «Hizb ut-Tahrir davasınıñ» mabüsi Cepparovnıñ alı fenalaşa – advokat


Yaltalı «Hizb ut-Tahrir davasınıñ» mabüsi Arsen Cepparovnıñ alı fenalaşa, dep bildirdi advokatı Cemil Temişev. Cepparovnıñ başı ağıra, lâkin SİZO reberligi oña tibbiy yardım köstermey.

«Arsen Cepparovnıñ sağlığı pek fena edi, onıñ baqılmasını talap ettik. Antibiotik berildi, yanğı alındı. Men raatım dedim. Tedaviylenmege devam etecek, dep tüşündim. Maalesef, bugün bir şey yapılmay. Arsen baş ağrısından qıynala», – dep tarif etti advokat «Qırım birdemligi» cemaat birleşmesiniñ körüşüvinde.

Temişev Cepparovğa basqı yapmağa devam etkenlerini de ayttı.

«Tasdıqlanmağan malümatqa köre, onı kartserge yollaycaq olalar, menim bundan haberim yoq. Bazarertesi künü saba SİZOdan tafsilâtlı bir malümat almağa tırışacam. Bundan evel saqalından sebep kartserge yollağan ediler. Amma Arsenni körgenler bile, saqalı yoq demege mümkün. Taqiqat Arsenniñ davasında delil tapmayıp, oña basqı yapıp boysunıdıracaq ola, dep tüşünem», – dedi advokat.

Kreml kontrol etken Qırım Yuqarı mahkemesi aprelniñ 20-de Yaltalı «Hizb ut-Tahrir davasınıñ» mabüsi Cepparovnı apiste qaldırdı.

Yaltalı «Hizb ut-Tahrir davasınıñ» mabüsleri Refat Alimov ve Arsen Cepparov 2016 senesi aprel 18 künü Qızıltaşta yaqalanğan soñ apiste yatalar. Birinci dört Yaltalı «Hizb ut-Tahrir işiniñ» mabüsi 2016 senesi fevral 11 künü yaqalanğan edi. Olardan eñ çoq tanılğan insan aqları kontakt gruppasınıñ azası Emir-Üsein Kukudır. Ondan ğayrı qurucı olıp çalışqanlar aluştalı Muslim Aliyev ve Qızıltaş köyüniñ sakini Enver Bekirov, em de Yaltalı çeçek satıcısı Vadim Sirük tutulğan edi.

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.



XS
SM
MD
LG