Qırımtatar milliy areket yetekçilerinden biri Ahtem Çiygoz, Aqmescitniñ apishanesinde bulunıp, qırımtatarı Ervin İbragimovnıñ esir etilmesinden bir yıl keçkeni munasebetinen mektüp yazdı. Mektüpniñ metinini Çiygoznıñ ömür arqadaşı Elmira Ablâlimova Facebookta paylaştı.
Çiygoz, 12 yıl evelsi İbragimovnen tanışqanını hatırlay, onıñ Meclis azası ve Bağçasaray şeer şurasınıñ deputatı vazifesinde yapqan areketi aqqında tarif ete ve onıñ siyasiy faaliyetini «başqalar içün örnek» olaraq tanıta.
«İç bir zaman bir de bir imtiyazlar aqqında tüşünmey edi, teşebbüsçi edi, oña bir şeyler rica etseñ, o «yoq» aytıp olamay edi», – dey Çiygoz.
Çiygoznıñ sözlerne köre, İbragimovnıñ esir etilmesi içün işğal etilgen Qırımnıñ Rus akimiyeti mesül.
«Halqımız içün bu ağır künlerde Ervin, mertlik ve cesaret kösterip, öz siyasiy faaliyetini devam etti. Bizim semetdeşlerimizge qarşı cinayet işlegen aydutlarnıñ areketleri içün bütün mesüliyet Rusiye akimiyetine asıladır! Halqımızğa qarşı cinayet yapmaq içün olar öz tamam böyle insanlarnı seçeler, halqınıñ ürmetini ve itibarını qazanğan tamam böyle adamlardan qorqalar!» –dedi Çiygoz.
Bağçasarayda qırımtatarı Ervin İbragimovnıñ qaçırılmasından bir yıl keçkeni munasebetinen mayısnıñ 24-nde evi yanında dua merasimi yapılacaq.
Dünya qırımtatar kongressi icra şurasınıñ azası Ervin İbragimov 2016 senesi mayısnıñ 24-de Bağçasarayda belgisiz insanlar tarafından qaçırıldı. Video nezareti kamerası Rusiye yol inspektorları urbasında eki adam İbragimovnıñ maşinasını toqtatıp, onı mikroavtobusqa oturtqanını qayd etti.
Qırım işğalinden soñ yarımadada insanlarnıñ, ekseriyeti qırımtatarlarnıñ, ğayıp olma adiseleri sıqlaştı. Bunen beraber Rusiyeniñ Qırımdaki Taqiqat komiteti tasdiqlay ki, «qırımtatarlarnıñ büyük sayıda ğayıp olması qayd etilmey».
Qırım uquq qorçalayıcı gruppasınıñ tahminlerine köre, insanlar Rusiye akimiyeti ya da onıñ kontroli altında bulunğan taqımlar tarafından qaçırıla bile. Qırım akimiyeti insanlarnıñ ğayıp olmasını tanıy, amma onıñ alâqası bar olğanını inkâr ete.
