Bağçasarayda qırımtatarı Ervin İbragimovnıñ qaçırılmasından bir yıl keçkeni munasebetinen mayısnıñ 24-nde evi yanında dua merasimi yapılacaq. Bunı qırımtatar milliy areketiniñ liderlerinden birisi İlmi Umerov Facebookta bildirdi.
«Mayısnıñ 24-nde, saat 18.00, Bağçasarayda, Ervin İbragimov yaşağan Mira soq., 18 adresi boyunca evi ögünde dua olacaq. Er kes qoşula bile. Allahtan qaçırılğan Ervinniñ qorantasına sağ qaytmasını isteycekmiz...», – dep yazdı Umerov.
Dünya qırımtatar kongressi icra şurasınıñ azası Ervin İbragimov 2016 senesi mayısnıñ 24-de Bağçasarayda belgisiz insanlar tarafından qaçırıldı. Video nezareti kamerası Rusiye yol inspektorları urbasında eki adam İbragimovnıñ maşinasını toqtatıp, onı mikroavtobusqa oturtqanını qayd etti.
«KrımSOS» teşkilâtı er ay Kyivdeki Rusiye elçihanesi ögünde ğayıp olğan qırımlılarğa qoltutmaq içün «Ervin qayda?» aktsiyasını teşkil ete. 10 aktsiya endi olıp keçti. Aprel ayında aktsiya «Ğayıp olmaq: Rusiyede ğayıp olğanlar» şiarı altında keçirildi.
Qırım işğalinden soñ yarımadada insanlarnıñ, ekseriyeti qırımtatarlarnıñ, ğayıp olma adiseleri sıqlaştı. Bunen beraber Rusiyeniñ Qırımdaki Taqiqat komiteti tasdiqlay ki, «qırımtatarlarnıñ büyük sayıda ğayıp olması qayd etilmey».
Qırım uquq qorçalayıcı gruppasınıñ tahminlerine köre, insanlar Rusiye akimiyeti ya da onıñ kontroli altında bulunğan taqımlar tarafından qaçırıla bile. Qırım akimiyeti insanlarnıñ ğayıp olmasını tanıy, amma onıñ alâqası bar olğanını inkâr ete.
