Aqmescitniñ Kiyev rayonı Rusiye Taqiqat komiteti mayısnıñ 22-nde fail Bilâl Adilovnı sorğuğa çağırdı. Mart ayınıñ soñunda uquq qoruyıcılar onı Kreml kontrol etken Qırım Yuqarı mahkemesiniñ binası yanında mabüslerniñ azat etilmesi içün dua oquğanda tutqan edi.
«Bugün Kiyev rayon Taqiqat komitetine daa bir taqiqat tedbirine ketemiz. Hatırlatayım, Bilâl Adilovğa qarşı Rusiye Federatsiyası Ceza kodeksiniñ 318-inci maddesi boyunca cinaiy iş açıldı. Barğan soñ taqiqatçı ne istegenini añlap, ileri planlarımıznı bilecekmiz», – dep ayttı Adilovnıñ advokatı Edem Semedlâyev Qırım.Aqiqatqa.
Martnıñ 29-nda Kreml kontrol etken Qırım Yuqarı mahkemesiniñ binası yanında belgisiz insanlar Bilâl Adilovnı qaçırğan edi.
Video çıqarğan şaatnıñ telefonını yerge atıp, Adilovnı mikroavtobusqa mindirip alıp kettiler. Onı Qırımdaki Taqiqat komitetiniñ Rusiye idaresine alıp kettiler.
Failge qarşı cinaiy iş açıldı, onı akimiyet vekiline qarşı zorbalıq qullanması ve telükege oğratmasında qabaatlaylar.
Kreml kontrol etken Aqmescitniñ Kiyev rayonı mahkemesi Bilâl Adilovnı azat etmege qarar çıqardı. Taqiqatçınıñ apis cezasını berme muracaatı red etildi. Al-azırda Bilâl Adilov çıqmamaq şartı altında qala.
Rusiye Qırımnı işğal etken soñ yarımadada mustaqil jurnalistler, cemaat failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, qırımtatar Milliy areket failleri, Meclis azalarınıñ evlerinde tintüvler sıqlaştı.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
