Link açıqlığı

Polozov: mahkeme «Çiygoznıñ davasında» Çubarovnı şaat olaraq çağırttırmaq muracaatını baqmaycaq oldı


Klemlniñ nezaretindeki Qırım Yuqarı mahkemesi Qırımtatar Milliy Meclis reisi Çubarovnı «Çiygoznıñ davasında» şaat olaraq çağırttırmaq muracaatına dair qarar almağa red etti. Bunen beraber advokat Nikolay Polozov, Qırım.Aqiqatqa bergen izaatında, mahkeme «talimat almaq içün» vaqıt qazanmağa istegenini ayttı.

«İmaye tarafı, şaat olaraq Refat Çubarovnı çağırttırmağa, (Rusiyeniñ – QA) Cinaiy Kodeksiniñ 456-ci madesi esasında, oña toqunılmamazlıq kefaletini bermege muracaat etti. Lâkin mahkeme be muracaatnı diñlep, iç bir qarar almaycaq oldı. Bir şaatnıñ sorğusı endi başlanğanı sebep olaraq kösterildi. Fikirimce, mahkemeciler qarar almaq içün, bese-belli, vaqıt qazanacaq oldılar. Belki de, reberlerinen ya da siyasiy idarecilernen aqıl tanışmaq, yolbaşçılardan talimat almaq içün vaqıt kerektir», – dedi Polozov.

Advokatnıñ sözlerine köre, adilyeviy cetten, işğal etilgen Qırımğa Refat Çubarovnıñ çağırılmasında iç bir mania yoq.

Kremlniñ nezaretinde çalışqan Qırım Yuqarı mahkemesinde mayısnıñ 22-nde qırımtatar milliy areketiniñ yetekçilerinden biri Ahtem Çiygoznıñ mahkeme davası baqılmağa devam etti. Aqmescit apishanesinen video-bağ olmağanından sebep, mahkeme toplaşuvı vaqıtında başlanmadı.

Mayısnıñ 15-nde Meclis reisi Refat Çubarov, Kyivde ötkerilgen matbuat konferentsyası devamında, öz muavini Ahtem Çiygoznıñ davasında imaye tarafınıñ şaatı olıp ifade bermege azır olğanını beyan etken edi. Çubarov öz beyanıtını seslendirip, Kreml nezaretindeki Qırım Yuqarı mahkemesi toplaşuvına, özüniñ şaatlıq yapmaq içün çağırılmasına razılıq berdi.

Ahtem Çıygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ territorial bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.

«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.

XS
SM
MD
LG