Aqmescitte 9 mayısqa bağışlanğan arbiy parad olıp keçti. Er şey Rusiye adetlerine köre oldı: voyenpromnıñ ilk ğalebeleri, ulu cenkniñ 1947 senesi doğma veteranlarınıñ minnetdarlıq bildirgen ve ğurur tolu közleri, sovet cebe urbasını kiygen bahtlı balalar. Bu künleri sürgünlik qurbanlarını añuv kününe azırlanğan qırımtatarları toplu yaşağan yerlerde ise kene bir sıra tintüv oldı, insanlar tutıldı.
Meydanlarğa Zafer kününe quvanğan Aqmescit sakinleri Sudaqta oturğan İlver Ametovnıñ qorantası oğrağan vaziyetni eşitmegendir. Mayısnıñ 8-nde saba, büyük şeerlerde «Ölmez polk» kolonnaları tizilgende, rayon Meclisiniñ reisi yaşağan evine uquq qoruyıcılar tintüv keçirmege keldi. Bir şey tapmayıp, oğlunı kötekledi ve alıp kettiler. İlver ve tuvğanları oğlu ne içün ve qayda alıp ketirilgenini bir qaç saat bilmege tırıştılar.
9 mayıs bayramı Rusiyede ealini cenkke azırlıq aletine çoqtan çevirildi
Bundan soñ OMON askerleri diger yerli sakin Server Toroznı tutıp kettiler. Bunıñ da sebepleri aytılmadı. Sudaq musulman cemiyeti narazılıq bildirse de, onı da evinde tuttılar. Rusiye «uquq qoruyıcı organlarınıñ» vekilleri tarafından mayısnıñ 7-10 devamında qırımtatarlarğa olğan büyük diqqat haberleri yarımadanıñ diger regionlarından da kele edi.
Qırımda olğan yañı repressiyalar Zafer kününiñ qayd etilmesinen nasıl bağlı? Aseletmi yapıla? Tesadufmı ola? Elbet de, yoq, mında tüşünmege de kerekmey.
Rusiyege Qara deñizni kontrol etmege imkân bergen Qırımnıñ arbiy bazağa çevirilmesi yarımadanıñ raatlıq imkânlarını yoq ete ve cemaat yaşayışınıñ askerleştirmesine ketire. 9 mayıs bayramı Rusiyede ealini cenkke azırlıq aletine çoqtan çevirildi.
Rusiye devleti tışqı siyasetinde istilâiy kenişleme ve içki siyasetinde «demir el» printsibi esasında quruldı
Rusiye devleti tışqı siyasetinde istilâiy kenişleme ve içki siyasetinde «demir el» printsibi esasında quruldı. Böyle bir yanaşmanıñ temeli devlet siyasetinde XVIII asırnıñ başında imperiyanı ilân etken Birinci Petr tarafından qoyulğan edi. Vladimir Putin yañı bir şey uydurmadı.
Er angi muhalifet küçleriniñ açıq bastırılması askerleştirmeniñ diger tarafını köstere. Resmiy teşviqatnıñ esas mevzusı «tekrarlay bilemiz» olğance cemiyet bugün Rusiyede aytılmağan şeylerge tekrar oğray bile. Misal olaraq, qırımtatarları er yıl Aqmescitte ve işğal etilgen yarımadanıñ diger mesken yerlerinde hatırlatqan 18 mayıs faciası.
Maksim Osadçuk, qırımlı, siyasetşınas
«Bloglar» rubrikasında bildirilgen fikir-tüşünceler müelliflerniñ noqtaiy-nazarını aydınlatıp, muarririyetniñ baqışları ile aynı olmaması mümkün