Link açıqlığı

Çubarov advokatqa Çiygoznıñ davasında sorğudan keçmege razılığını berdi


Qırımtatar Milliy Meclis reisi Refat Çubarov mayısnıñ 19-nda, Meclis reisiniñ muavini Ahtem Çiygoznıñ davazında imayeci olaraq iştirak etken advokat Nikolay Polozov ile körüşip, şaat sıfatında sorğudan keçmege razı olğanı aqqında muqaveleni teslim etti.

«Bügün Qırımtatar Milliy Meclisniñ ofisinde advokat Nikolay Polozovğa muqavaleni teslim etip, Meclis reisiniñ muavini Ahtem Çiygozğa qarşı açılğan cinaiy işte şaat olaraq sorğuğa celp etilmege razı olğanımı tasdiqladım», – dep haber etti Çubarov.

Mayısnıñ 15-nde Meclis reisi Refat Çubarov, Kyivde ötkerilgen matbuat konferentsyası devamında, öz muavini Ahtem Çiygoznıñ davasında imaye tarafınıñ şaatı olıp ifade bermege azır olğanını beyan etken edi. Çubarov öz beyanıtını seslendirip, Kreml nezaretindeki Qırım Yuqarı mahkemesi toplaşuvına, özüniñ şaatlıq yapmaq içün çağırılmasına razılıq berdi.

Nikolay Polozov mayısnıñ 16-nda, Ahtem Çiygoznıñ imayesi bazarertesi, 22 mayıs künü Refat Çubarovnıñ şaat olaraq soraştırılması aqqında muracaatnı mahkemede teklif etecegini bildirgen edi.

Ahtem Çıygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ territorial bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.

«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.

XS
SM
MD
LG