Qırımtatar halqı Meclisiniñ yolbaşçısı, Ukraina halq deputatı Refat Çubarov Meclis yardımcısı Ahtem Çiygoz davasınen bağlı mahkemede şaatlıq yapmaq maqsadınen Qırımğa barmağa niyetlene. Bu aqta Çubarov mayısnıñ 15-de Kyivde ötkerilgen matbuat konferentsiyasında bildirdi.
Çubarov, Kreml nezaretindeki Qırım Yuqarı mahkemesi toplaşuvına, onı şaatlıq yapmaq içün çağırmasına razılıq bergen beyanatını oqup berdi. O, öz beyanatını Ahtem Çiygoznıñ advokatı – Nikolay Polozovqa, o mayısnıñ 19-da Kyivge kelgen vaqtında bermek niyetinde.
«Men, dava boyunca obyektiv malümat berebilecek birisi olam. Qırımda bulunğan arada men, Rusiye qanunına binaen (Rusiye CK 456 maddesi - QA) toqunmamazlıq aqqına saip olmalım. Elbette bu şartlar, olar meni resmiy sürette mahkemege çağırğan taqdirde küçke kirer», – dep izaatladı Meclis yolbaşçısı.
Mayısnıñ 11-de Çiygoz davasında Kreml nezaretindeki Qırım Yuqarı şurasınıñ mahkemesi toplaşuvında şaatlıq yapqan eki şaat, qabaatlanğan şahıs 2014 senesi febralniñ 26-da QMC Yuqaru Şurası ögündeki mitingde insanlarnı yatıştırmağa areket etkenini körgenleri aqqında ayttılar. Nevbetteki toplaşuv mayınıñ 15 saat 9:30da ötkerilecek.
Ahtem Çıygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ territorial bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.
«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.
Aprelniñ 19-da BMT Halqara mahkemesi «Ukraina Rusiyege qarşı» davası boyunca işğal etilgen Qırım sakinlerini qorçalamaq maqsadınen muvaqqat tedbirler kirsetken edi. Mahkeme, ukrainlerniñ aqlarına tüzetilmesi imkânsız olğan zarar berilmekte degen qarar qabul etken edi.
Mahkeme Rusiyeni, soñ qarar qabul etilgence, qırımtatar halqına öz aqlarını temsil etüv meselesinde aqlarını bozmamasına, Meclisniñ faaliyeti tekrar canlandırmasına ve yarımadada ukrain tilinde tasil aluvnı temin etmesine mecbur etken edi.
