Ukraina prezidenti Petro Poroşenko, 2014 senesi baarde öldürilgen qırımtatarı Reşat Ametovğa Ukraina Qaramanı unvanını berdi. Bunı Poroşenko Ukrainanıñ Milliy opera binasında qırımtatar halqı genotsidiniñ yıllığı munasebetinen ötkerilgen matem aqşamında beyan etti.
2017 senesi mart ayında Ukraina millet vekili Sergiy Vısotskiy, prezident Petro Poroşenkoğa muracaat etip, Reşat Ametovğa Ukraina Qaramanı unvanını bermege rica etken edi.
2014 senesi mart 3 künü Reşat Ametov Aqmescitteki Qırım Nazirler Şurasınıñ binası yanına kendi narazılıqnı bildirmek içün çıqqan soñ qaçırıldı. Mart 15-de ise onıñ cesedi bir çoq qıynav izleri ile Qarasuvbazar rayonında ormanda tapılğan edi. Faalniñ cenazesi 2014 senesi mart 18-de Aqmescitteki «Abdal» mezarlığında qılınğan edi.
Moskva kontrol etken Qırım akimiyeti qırımtatar failiniñ qatilini tapqanını mukâfatnen taqdirlemege söz bergen edi. Lâkin qatil öyle de tapılmadı.
18 mayıs künü Ukrainada memorial tedbirlerniñ keçirilmesi planlaştırıla. Er yıl bu künü tamır halq 1944 senesi yarımadadan Orta Asiyağa sürülgeninen bağlı facialı vaqialar hatırlana. Episi olıp 180 bin insan sürülgen edi. Ukrainada qırımtatarlarınıñ sürgüni genotsid dep tanıldı.
