Ukraina halq deputatı Sergey Vısotskiy prezident Petro Poroşenkoğa muracaat etip, 2014 senesi baarde öldürilgen qırımlı Reşat Ametovğa Ukraina Qaramanı unvanını bermege rica etti. Bunı Vısotskiy mart 3-de Facebook saifesinde yazdı.
«Bugün Reşat Ametovnıñ qaçırılmasına ve vahşiyce öldürilmesine üç yıl tola. O, Qırım işğaline qarşı mitingden soñ qaçırdılar. Onı qıynap öldürdiler. O, Qırım Ukraina olğanını açıq-aydın aytqan edi. Prezident Petro Poroşenkoğa muracaat etip, Reşat Ametovnı Kök Yüzü Qaramanları ile aynı sırağa kirsetip, Ukraina Qaramanı unvanını bermege rica ettim», – dep yazdı Vısotskiy.
2014 senesi mart 3 künü Reşat Ametov Aqmescitteki Qırım Nazirler Şurasınıñ binası yanına kendi narazılıqnı bildirmek içün çıqqan soñ qaçırıldı. Mart 15-de ise onıñ cesedi bir çoq qıynav izleri ile Qarasuvbazar rayonında ormanda tapılğan edi. Faalniñ cenazesi 2014 senesi mart 18-de Aqmescitteki «Abdal» mezarlığında qılınğan edi.
Moskva kontrol etken Qırım akimiyeti qırımtatar faaliniñ qatilini tapqanını mukâfatnen taqdirlemege söz bergen edi. Lâkin qatil öyle de tapılmadı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ihlâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
