Link açıqlığı

Jurnalist, televizyon ve radio alıp barıcısı Andrey Kulikov, Qırımnı işğal etken soñ 1944 senesindeki qırımtatarlarınıñ genotsidi meselesini Rusiye Ukrainağa qarşı informatsion cenk maqsadınen qullanabilir, dep saya. Bu aqta Kulikov mayısnıñ 17-de Qırım.Aqiqatqa bergen izaatında ikâye etti.

«Endiden soñ, qırımtatarlarınıñ genotsidi, sürgüni meselesini Rusiye, oña qarşılıq köstergen Ukrainağa qarşı alıp barğan informatsion cenkinde qullanabilir. Hususan, aktsentleniñ yeri biraz deñişti. Eger evelki zamanlarda qırımtatarlarınıñ genotsidinde stalin rejimi qabaatlı denilip kelgen olsa, artıq sıq-sıq bu Moskvanıñ cinayeti olğanı aqqında eşitmek mümkün. Onıñ devamını bügün de köremiz», – dep esaplay Kulikov.

18 mayıs – Qırımdan sürgün etilgen qırımtatar halqı qurbanlarını añma Künü. 1944 senesi bu künü yarımadadan Orta Asiyağa qırımtatarları toldurılğan ilk eşelon yollanılğan edi. Episi olıp 180 biñ insan sürgün etilgen edi.

Er yıl Qırımda sürgün munasebetinen, şu cumleden Qırım paytahtında matem mitingi olmaq üzre, kütleviy tedbirler ötkerile edi. Lâkin 2014 senesi mart ayında yarımadanı Rusiye zapt etken soñ, Aqmescit merkezinde böyle bir tedbirlerniñ keçirilmesi yasaqlandı.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG