Qırımtatar halqı Meclisiniñ azası Eskender Bariyev, Kreml nezaretindeki Qırım akimiyeti Bütündünya qırımtatar kongressine alternativ teşkil etmek istey, dep esaplay. Qırım akimiyeti çeteldeki qırımtatar diasporalarını birleştirmek maqsadınen yarımadada konferentsiya teşkil etmek istegenini Bariyev bu şekilde izaatlay.
«Olar diasporalarnı celp etip, halqara cemaatçılıqqa işğal altındaki Qırım ve anda yaşağan qırımtatarları diasporalarnen sıq ve yahşı işbirlik yapalar ve işte, böyle bir halqara konferentsiyalar teşkil eteler dep köstermek içün, yañı şekil qıdırmaqta. Bu Bütündünya qırımtatar kongressine alternativ tapma ıntıluvlarıdır», – dep ayttı Bariyev mayısnıñ 16-da Qırım.Aqiqatqa bergen izaatında.
Bariyevniñ fikrine köre, şu cumleden Qırımnıñ şimdiki akimiyeti BMT Halqara mahkemesiniñ «Ukraina Rusiyege qarşı» davası çerçivesindeki muvaqqat tedbirlerge böyle cevap bermekte. Konferentsiya keçirme teşebbüsi ukrain eyyetiniñ BMTniñ tamır halqlar meselesinen bağlı forumunda iştirak etmesinen alâqalıdır, dep saya o.
Qırım SMİ (KHV) bildirgenine köre, mayısnıñ 17-de Aqmescitte qırımtatarlarınıñ çeteldeki diasporalarını birleştirecek konferentsiya açılacaq.
Aprelniñ 19-da BMT Halqara mahkemesi «Ukraina Rusiyege qarşı» davası boyunca işğal etilgen Qırım sakinlerini qorçalamaq maqsadınen muvaqqat tedbirler kirsetken edi. Mahkeme, ukrain ve qırımtatarlarınıñ aqları bozulmamasına, Meclisniñ faaliyeti tekrar canlandırmasına ve yarımadada ukrain tilinde tasil aluvnı temin etmesinen bağlı qarar qabul etken edi. Böyleliknen halqara mahkeme Rusiyeni, ırqçılıqnıñ bütün şekillerini lâğu etmesinen bağlı şartnamege riayet etmesine mecbur etken edi.
Birinci Bütündünya qırımtatar kongressi 2009 senesi mayıs ayında Aqmescitte keçirilgen edi. O zaman anda 12 devletten kelgen 160 qırımtatar ictimaiy-siyasiy teşkilâtını temsilen 800 yaqın delegat iştirak etken edi.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
