Link açıqlığı

Qırımda Umerovğa qarşı cinaiy işniñ açılmasından bir yıl keçkeni munasebetinen dua merasimi teşkil etildi


İlmi Umerovnıñ azbarında dua merasimi, 12 mayıs 2017 senesi

İşğal etilgen Qırımda mayısnıñ 12-nde Qırımtatar Milliy Meclis reisiniñ muavini İlmi Umerovnıñ evi yanında, oña qarşı cinaiy işniñ açılğanından bir yıl keçkeni munasebetinen, dua merasimi ötkerildi.

«Dua – arap tilinden tercime etilse, «yalvaruv» demektir, bu Yüce Allahqa yardım muracaatıdır. Bügün biz Allahqa dua ettik, O,ilk evelâ, eñ ağır vaizette olğanlarğa küç, sabır ve metanet bersin. Ve, ekincisi de, bügün bu areketlerni (tintüv ve apis etüvlerni – QA) yapqan adamlarğa Allah-u Taalâ közlerini açsın, olar bu yolnıñ iç bir yerge alıp kelmeycegini añlasınlar», – dedi Qırım.Aqiqatqa fail Nazim Şeihmambetov.

İlmi Umerovnıñ sözlerine köre, o Allahqa dua yapmağa istegenlerni öz azbarına davet etti, O olarğa «Qırımnıñ işğalci akimiyeti yaratqan müşkülliklerni keçmek içün küç ve irade bersin» dep.

Umerov: «Rusiye Federatsiyasınıñ uquq qoruyıvı sisteması Qırımda advokatlarğa basqı yapmaqta talim ala. Misal içün, bu siyasiy dava meni qorumaları içün dört advokatnen añlaştım. Olardan üçüne çeşit-türlü tesir usulları qullanıladı», – dedi.

Bundan evel Bağçasarayda «Hizb ut-Tahrir davası» boyunca Bağçasaraynıñ dört sakini tutılğanından bir yıl keçkeni munasebetinen dua keçirilgen edi.

İlmi Umerovğa qarşı ekstremizm maddesi boyunca FSB tarafından cinaiy iş açılğanını 2016 senesi mayıs 12 künü Qırımnıñ sabıq prokurorı Natalya Poklonskaya beyan etken edi.

Meclis reisi muavininiñ yaqalanuvı, tintüvi ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada rezonans çıqarğan edi.

Keçken sene mayısnıñ 12-nde Bağçasarayda Rusiye uquq qoruyıcıları musulmanlarnıñ evlerinde ve yerli qavehanede tintüvler keçirgen edi. Neticede 4 Bağçasaray sakini yaqalandı ve terrorizm ile qabaatlandı: Zevri Abseitov, Remzi Memetov, Rustem Abiltarov ve Enver Mamutov. Olar Rusiyede yasaq etilgen «Hizb ut-Tahrir» teşkilâtında iştirak etkenlerinde şeklenip FSB hadimleri tarafından yaqalanğan ediler.

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

Rusiye Qırımnı işğal etken soñ yarımadada mustaqil jurnalistler, cemaat failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, qırımtatar Milliy areket failleri, Meclis azalarınıñ evlerinde tintüvler sıqlaştı.

XS
SM
MD
LG