Link açıqlığı

Akimiyeniñ bizge qarşı yapqan areketleri qırımtatarlarnı birleştire – Umerov duadan soñra (video)


Bağçasarayda mayısnıñ 12-nde cemaat duası ötkerildi. Meclis reisiniñ muavini İlmi Umerovnıñ evinde 300-den ziyade qırım musulmanı toplaştı. Kütleviy toplaşuv ve merasimlerniñ yasaq etilgeni vaqıtta, dualar – qırımtatarlarğa, bir arada toplaşıp, basqılarğa oğrağan semetdeşlerine birdemlik köstermek içün yekâne imkân oldı. Dua merasimi «Hizb ut-Tahrir davası» boyunca «bağçasaraylı dörtniñ» tutılğanından ve İlmi Umerovğa qarşı cinaiy işniñ açılğanından bir yıl keçkeni munasebetinen ötkerildi. Bir yıl evelsi Bağçasarayda kütleviy tintüverden soñ Remzi Memetov, Rustem Abiltarov, Zevri Abseitov ve Enver Mamutov apis etilgen ediler. Soñra olae Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlandılar. Endi bir yıl devamında olar aztlıqtan marum etilgenler ve tuvğanlarını ancaq mahkeme salonlarında köre bileler. Şu künü İlmi Umerovğa da qarşı, separatizm ve Qırım işğalinen açıqtan razı olmağanı sebebi ile, cinaiy iş açılğan edi. Rusiye Qırımnı işğal etken soñ yarımadada mustaqil jurnalistler, cemaat failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, qırımtatar Milliy areket failleri, Meclis azalarınıñ evlerinde tintüvler sıqlaştı. «Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. «Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG