Qırımnıñ al-azırdaki statusı halqara cemaatçılıq tarafından tanılmaması yarımadada festivallerniñ keçirlmesine tesir etmekte. Çetel artistleri işğalden soñ, yarımada territoriyasında ötkerilgen soylârına baracağı yerine, esas Ukrainağa köçken Qırım festivallerine kelmege daa ziyade istekliler. Böyle bir fikirni Qırım.Aqiqat Radiosınıñ sabalıq efirinde Koktebel Jazz Festivaliniñ prezidenti Liliya Mlınarıç beyan etti.
«Bizim ğarpteki bütün agentliklerimiznen bayağı bir çalışıp, devletimizge kirmek ve festivalimizge kelmekniñ şartlarını añlattıq. Avropalı agentlikler em de, hususan Ameriklalı soylârı, Devlet departamenti tarafından tenbilengenini bilem, çünki olarnıñ ne yerge barğanına olar diqqatnen baqalar, bir de olar Moskva ve Piterge barmağa azırlar, lâkin Qırımğa degil», – dep ayttı o.
İşğal etilgen Qırımğa Amerikalı ve Avropalı yırcılarnıñ davet etilüvinen bağlı problema aqqında, 2016 senesi avgust ayında Koktebel Jazz Festivaliniñ prezidenti ve Rusiyeli televideniye alıp barıcısı Dmitriy Kiselöv bildirgen ediler. Onıñ sözlerine köre, 2016 senesi AQŞ Devlet departamenti Arturo Sandovalnı tenbilegeninden soñ, fertivalniñ teşkiliy komiteti onıñ iştirakçileri aqqında ilân etmegen edi. Almaniyalı De Phazz gruppasına da «öz devletiniñ akimeti tarafından basqı yapılğanından soñ», o Qırımğa kelmegen.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
