Link açıqlığı

Qırımda Hıdırlez bayramına 50 biñ insan keldi – akimiyet


Qırımda Hıdırlez bayramına 50 biñ insan keldi. Bu aqta mayısnıñ 7-de özüniñ Facebook saifesinde Kreml nezareti altındaki Qırım milletlerara munasebetler ve sürgün olunğan vatandaşlar komitetiniñ yolbaşçısı Zaur Smirnov yazmaqta.

«Cumhuriyetimizniñ eñ büyük ve dülber vaqiasına çevirilgen tedbirde 50 biñden ziyade insan iştirak etti», - dep qayd ete Smirnov.

Daa evel Kreml nezareti altındaki Qırım milletlerara munasebetler ve sürgün olunğan vatandaşlar komitetiniñ hadimi Murat Yazıciyev, mayısnıñ 6-da Bağçasarayda keçirilgen Hıdırlez bayramına «soñki yıllarğa nazaran bu yıl eñ çoq iştirakçi kelgen edi», dep beyan ete.

Mayısnıñ 6-da qırımtatar halqı Meclisiniñ reisi Refat Çubarov, Qırımda Hıdırlez bayramı kütleviy şekilde ziyaret etile demek maqsadınen Kreml nezareti altındaki yarımada akimiyeti tedbirge yerli mektep talebelerini ketirmekte, dep qayd etken edi.

Hıdırlez – türkiy milletlerniñ eñ büyük bayramlarından biri olaraq, XIX asırda üç kün devamında qayd etilgen. Bayram Hıdır (al-Hidr) ve İlyas (İlya) yerde körüşken künü yani mayısnıñ 6-da qayd etilir. Merasimlerde qadimiy ayvanasravcılıq çizgileri körünmekte.

Qırım işğal etilgen soñ qırımtatar halqı Meclisiniñ temsilcileri Qırım Hıdırleziniñ qayd etüv merasiminde iştirak etmekni red etken ediler. Olar yarımadadaki öz semetdeşlerine de bu bayramnıñ qayd etüv merasimlerinde iştirak etmemelerine tevsiye etken edi.

XS
SM
MD
LG