Link açıqlığı

Qırımda Hıdırlez bayramı kütleviy şekilde ziyaret etile demek içün mektep talebeleri ketirile – Çubarov


Qırımda Hıdırlez bayramı kütleviy şekilde ziyaret etile demek maqsadınen Kreml nezareti altındaki yarımada akimiyeti tedbirge yerli mektep talebelerini ketirmekte. Bu aqta özüniñ Facebook saifesinde mayısnıñ 6-da qırımtatar Meclisiniñ reisi Refat Çubarov yazmaqta.

«Bugün keçirilgen Hıdırlez «şeñliklerinde» Qırımnıñ Rusiyege bağlı işğalci akimiyeti mektep avtobuslarını bile celp etmekte. Avtobusnıñ er birinde eki-üç ocadan ğayrı ekseriyeti talebeler», - dep yaza Çubarov.

Hıdırlez – türkiy milletlerniñ eñ büyük bayramlarından biri olaraq, XIX asırda üç kün devamında qayd etilgen. Bayram Hıdır (al-Hidr) ve İlyas (İlya) yerde körüşken künü yani mayısnıñ 6-da qayd etilir. Merasimlerde qadimiy ayvanasravcılıq çizgileri körünmekte.

Qırım işğal etilgen soñ qırımtatar halqı Meclisiniñ temsilcileri Qırım Hıdırleziniñ qayd etüv merasiminde iştirak etmekni red etken ediler. Olar yarımadadaki öz semetdeşlerine de bu bayramnıñ qayd etüv merasimlerinde iştirak etmemelerine tevsiye etken edi. Haber etilgenine köre, bu yıl Hıdırlez bayramı Qırımnıñ Rusiyege bağlı yolbaşçısı Sergey Aksönovnıñ «imayesi» altında qayd etilecek eken.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG