Link açıqlığı

Çubarov: Rusiye Avropa Şurasınıñ Qırımnen bağlı qararını eda etmemeknen özüni köşege sıqıştıra


Qırımtatar halqı Meclisiniñ reisi Refat Çubarov, Rusiye Avropa Şurasınıñ Qırmnen bağlı qararını yerine ketirmemeknen özüni halqara izolâtsiya köşesine sıqıştırmaqta, dep saya. Bu aqta Çubarov mayısnıñ 6-da Kyivde keçken «Qırımtatar siyasetçileri neni hayal eteler» adlı körüiüvde söz yürsetti, dep bildire Qırım.Aqiqatnıñ muhbiri.

«Rusiye ilk defa, yalıñız tam uzlaşuvğa barılğanda ve özü aza olğan teşkilâtlarnıñ qararlarını eda etecegini bayan etti. Demek ki bu, Rusiye iç bir vaqıt özüne qarşı rey bermeycek degen manağa kele. Rusiye özüni halqara izolâtsiya köşesine sıqıştırmağa devam ete», - dep saya Çubarov.

Mayısnıñ 5-de Rusiye Tışqı işler nazirligi Avropa Şurası nazirler Komitetiniñ işğal etilgen Qırım ve Aqyarnen bağlı işbu qararnı eda etmeycegine dair resmiy reaktsiyasını ilân etti.

Avropa Şurasınıñ idariу organı – Nazirler komiteti – mayısnıñ 3-de Strasburgta qarar qabul etip, Rusiyege bir sıra talaplar qoydı. Bular hususan, Qırımtatar Milliy Meclisi yasağınıñ lâğu etilmesi, onıñ liderleriniñ işğal etilgen Qırımğa kirsetilmesi, insan aqlarınıñ bozıluvını ve azlıqnı teşkil etken halqlarnıñ taqip etilmesiniñ toqtatılması, Avropa Şurasınıñ uquq qorçalav müessiselerini yarımadağa yiberilmesinen bağlı.

XS
SM
MD
LG