Link açıqlığı

Herson vilâyetiniñ memuriyeti Qırım sıñırında yañı sabit beton bendini işke tüşürdi. Bu aqta aprelniñ 30-da TSN bildirmekte.

Damba bir yıl içinde qurularaq, 35 million grivnağa mal etilgeni qayd etilmekte.

«Birinci basamağı bitti. Devamı - infrastrukturasınıñ meydanğa ketirilmesinen bağlı. Bular yük köterüv donatması, nevbetçi odası, qaravulhaneler demek», - dep ikâye etti Şimaliy-Qırım kanalınıñ baş muendisi Vladimir Oberemok.

«Yañı dambanıñ er zaman suvnı açmağa imkân bergen qapağı bar. Onıñ içün, Qırım Ukrainağa keri qaytqanında Şimaliy-Qırım kanalınıñ daa 300 kilometri suvnen toldurulacaq», - dep ilâve etti o.

Dambanıñ qurulışı bitkeni aqqındaki haber daa evel çıqqan edi.

Daa evel Herson vilâyeti devlet idaresi (VDİ) ziraat ve sanayı siyaseti departamentiniñ müdiri Aleksandr Polivoda, Şimaliy-Qırım kanalınıñ 107-nci kilometrinde sabit damba qurulğan soñ, vilâyetke bağlı suvarılğan topraqlarnıñ umumiy alanı 47 biñ gektarnı teşkil eteceği, Qırım topraqları suvarılmağanı sebebinden de, ziraatçılar işlerini devam etip olamaycaqlarını aytqan edi.

Rusiye Qırımnı istilâ etken soñ, yarımadanı Dnepr özeninen bağlağan ekâne suv yolağı olğan Şimaliy-Qırım kanalından suv berilmesi kesilgen edi.

Dneprden kelgen suv kesilmesi neticesinde suvarıluv vastasınen asralğan Qırım ziraatçılığı çoq zarar körgen edi. Qırımnıñ suvarılğan 140 biñ gektar toprağından yerli suv imkânlar qullanaraq suvarılğan yalıñız 17 biñ gektar topraq qaldı. Artıq pirniç asralmay. Bir yıldan soñ suvarılğan topraq alanı 13,4 biñ gektarğace tüşti.

XS
SM
MD
LG