Link açıqlığı

Açlıq tutqan Zeytullayevniñ ükmü çıqarılması arfesinde oña qoltututmaq içün online aktsiya keçirile


İçtimaiy ağlarnıñ onlarnen qullanıcısı «Hizb ut-Tahrir davası» mabüsleriniñ birisi Ruslan Zeytullayevge online qoltutuv aktsiyasına qoşuldı. Aprelniñ 26-nda Rusiyedeki mahkeme onıñ ükmüni seslendirmeli. İnsanlar Zeytullayevni azat etmek talabı ile fotoresimli levhalarnı paylaşa ve #freezeytullayev dep yaza.

Ukrain ressamları, jurnalist ve uquq qorçalayıcıları «Euromaydan SOS» vatandaş teşebbüsiniñ aktsiyasında iştirak etip, mahsus fotoresimlerden Ruslan Zeytullayevniñ adını yazdılar.

«Moskvanıñ yañıstalin repressiv maşinasınıñ vahşiyligi Ruslan Zeytullayevniñ azatlıqqa ıntıluvına urulıp kete. Böyle insanlar daima serbest. Ruslan, yaşamalısın!», – dep çağırdı ukrain jurnalisti Ruslan Çayka.

Bundan evel açlıq tutqan Zeytullayevge qoltutuv aktsiyasına Türkiyede de qoşulğan ediler.

«Euromaydan SOS» vatandaş teşebbüsiniñ faalcileri «Hizb ut-Tahrir davası» mabüsleriniñ birisi Ruslan Zeytullayevge online qoltutuv aktsiyasını ilân etti. O, aprelniñ 4-nde açlıqnı ilân etken edi. Uquq qorçalayıcı, «Euromaydan SOS» koordinatorı Aleksandra Matviyçuk, aktsiyanıñ esas maqsadı – Ukraina vatandaşlarına işğal etilgen Qırım sakinleri oğrağan vaziyetni ve Zeytullayevniñ zorbalıqsız qarşılıq örnegini köstermektir, dep ayta.

Ruslan Zeytullayev aprel 4-de Rostov-na-Donu şeerinde Şimal-Kavkaz bölge arbiy mahkemesiniñ toplaşuvında müddetsiz açlıq tutacağını ilân etti. O, Rusiye tarafına bir sıra talapbını seslendirdi: qırımtatarlarnı «terrorizm» ve «ekstremizm» maddeleri boyunca taqip etmemek, Ukraina TİN temsilcilerini oña muvaqqat apiske yibermege ve Aqyarlı «Hizb ut-Tahrir davasınıñ» başqa mabüslerini azat etmege talap etti.

Rusiyeniñ Rostov-na-Donu şeerindeki Şimal-Kavkaz bölge arbiy mahkemesi aprelniñ 26-nda Ruslan Zeytullayevniñ ükmüni seslendirecektir.

Rostov-na-Donu şeerindeki Şimal-Kavkaz bölge arbiy mahkemesi, 2016 senesi sentâbr 7 künü Zeytullayevni «terroristik cemiyette iştirak etkeninde» qabaatlı tanıdı ve oña 7 yıl apis cezasını berdi. Rusiye prokuraturası Rusiye Aliy mahkemeniñ bu qararına itiraz bildirdi ve dava, tekrar baqılmaq içün, kene de Şimal-Kavkaz bölge arbiy mahkemesine yollanıldı. Taqiqat organları, Zeytullayevnıñ terroristik cemiyet iştirakçisi degil de, teşkilâtçı olaraq tanılğanını istey. Rusiye Cinaiy Kodeksiniñ böyle maddesi, eñ azından 15 yıl ve atta ömürlik apis cezasına ketirmek mümkün.

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG