Link açıqlığı

Salı künü mahkeme Ganışnıñ işi boyunca Qırımnıñ sabıq baş naziri Mogilöv ve Meclis reisi Çubarovnı tekrar sorğuğa çekecek –advokat


Vasiliy Ganış, arhivden alınğan fotoresim

Kiyev şeeriniñ Dniprovskıy rayon mahkemesi aprelniñ 25 Salı künü hainlikte qabaatlanğan qırımlı sabıq deputat Ganışnıñ qabaatlayıcı taraf şaatları olğan qırımtatar Meclisiniñ reisi Refat Çubarovnen Qırım sabıq baş naziri Anatoliy Mogilöv ve başqalarını sorğuğa çekecek.

Bu aqta Ganışnıñ advokatı Andrey Rudenko kütleviy haber vastalarına (KHV) yapqan muracaatında bildirmekte.

«Mahkeme terkibi deñişken soñ işni tayin etilgen yañı terkiptekiler baqacaq. Bu demektir ki, şaatlar tekrar sorğuğa çekilecek, videomateriallar tekrar közden keçirilecek ve yazılı isbatlar tekrar tedqiq etilecek. 2017 senesi aprelniñ 25-nde saat 14:00 qabaatlayıcı tarafnıñ şaatları olğan Refat Çubarov, Anatoliy Mogilöv ve başqaları sorğuğa çekilmeli», – dep qayd etti Ganışnıñ imayecisi.

2017 senesi fevralniñ 22-nde Ukraina Yüksek adliye şurası Vasiliy Ganışnıñ işinen bağlı eyyetke yolbaşçılıq yapqan qadı Aleksandr Fedüknı öz vazifesinden çetkeştirgen edi. O, Evromaydan keçken künlerindeki çatışmalarda narazılıqnıñ eki iştirakçisini apiske alınacağınen bağlı qarar qabul etkeni sebebinden işten boşatılğandır. Bu sebepten Kiyev şeeriniñ Dniprovskıy rayon mahkemesi aprelniñ 5-nde Vasiliy Ganışnıñ işini ğayrıdan baqıp bailadı.

Vasiliy Ganış 2015 senesi aprelniñ 28-nde Qırımdan çıqqan maalinde SBU hadimleri ve ukrain Devlet sıñırcıları tarafından yaqlanğan edi. Sabıq deputat qıdıruvda olğanı içün apiske alınğan edi, Ukraina Baş prokuraturası ise onı devlet hainliginde şeklegenini bildirgen edi.

Ukrain taqiqçileri Ganışnı Qırımnıñ statusınen bağlı «referendum» keçirilgende rey berüvde iştirak etüvinen, kvorum toplanmasına qoltutqan birisi sıfatında, Ukrainanıñ bütünligine qast etilmesine hızmet etmekte qabaatlaylar. Ayrıca siyasetçi, 2014 senesi aprel ayınıñ 11-nde Rusiye nezareti altındaki Qırım parlamentinde Qırımnıñ Rusiye anayasasına rey bermekte de qabaatlanmaqta.

Sabıq deputat ise, Qırım parlamentinde «referendumge» qarşı yalıñız bir özü rey bergenini bildirmekte. Onıñ fikrine köre, devlet hainligindeki qabaatlavlar esassızdır.

XS
SM
MD
LG