Link açıqlığı

Qırım akimiyeti devlette çalışqanlarnı Hıdırlez bayramına avtobuslarnen ketirecek ola – faal


Bağçasaraydaki Hıdırlez, 2015 senesi

İşğal etilgen Qırımnıñ Rusiye akimiyeti kelecek ayda Hıdırlez qırımtatar bayramını teşkil ete. Bücet müessiseleriniñ hadimleri ve diniy erbaplar kütleviy şekilde merasimge ketirilecektir. Bunı Qırım faali Nariman Celâl Facebookta yazdı.

«Qırım akimiyeti kütleviy şekilde bayram olğanını kösterecek ola. Rayonlarda bu bayramğa insanlarnı toplamağa başladılar. Mesülietli reberler Qırımnıñ şeer ve köyleriniñ quvanğan sakinlerini bu bayramğa avtobuslarnen alıp ketecek bücette çalışqanlarnı toplay», – dep yazdı Celâl.

Krem kontrol etken Qırım akimiyetiniñ bunıñnen bağlı izaatları şimdilik yoq.

Hıdırlez – türk halqlarınıñ eñ büyük bayramlarından biridir, XIX asırda onı üç kün devamında qayd etken ediler. Mayısnıñ 6-da Hadır ve İlyas peyğamberleri qarşılaşqan künü olaraq qayd etile.

Qırım işğalinden soñ Qırımtatar Milliy Meclisiniñ vekilleri Qırımda Hıdırlezniñ qayd etilmesinde iştirak etmey. Semetdeşlerini de bayramnıñ qayd etilmesinden vazgeçmege çağırğan ediler.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG