Link açıqlığı

Şoygu Qırımda Rusiye ordusınıñ qısımları donatılğanını ilân etti


Rusiye Mudafaa nazirliginiñ kollegiya toplaşuvında, işğal olunğan Qırım ve Arktikada ordularınıñ qısımlarını donatacaq «2018 – 2025 senelerge devlet silâlandırma programması» leyhası muzakere etildi. Bu aqta aprel 12 künü Rusiye Mudafaa nazirliginiñ matbuat hızmeti bildire.

Rusiye Mudafaa naziri Sergey Şoygunıñ sözlerine köre, «leyhanıñ maqsadı – Silâlı quvetler, diger ordular, arbiy qısımlar ve organlarnıñ silâlanuv sistemasını kerekli derecefe teminlemek».

Yañı programmanıñ leyhasına köre Qırımda ve Arktikada ordularınıñ qısımları donatılacaq, qayd ettiler Rusiyedeki müessisede.

Ukraina istihbaratı işğal etilgen Qırım askerleştirgeni aqqında haber ete. Rusiye yarımadağa arbiy tehnikasını ve Silâlı quvetlerniñ şahsiy qısımını ketirmege devam ete.

2016 senesi Ukraina milliy telükesizlik ve mudafaa kâtibi Aleksandr Turçinov Rusiye faal surette asketrileştirgen Qırım – havflı olğanı aqqında bildirgen edi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG