Aqmescitteki Merkeziy bazarnıñ Kozlov soqağı rayonında maşinalar içün turaq qurmağa ve yeşil alan yapmağa planlaştıralar. Aprel 11-de mında ticaret noqtalarını yıqmağa başladılar.
Bu yerde abadanlaştıruv planları Kreml kontrol etken Aqmescit memuriyetiniñ saytında derc etildi.
«Kozlov soqağı rayonındaki abadanlaştıruv işleri yüz yerlik turaq ve cayav alanınıñ qurulmasını belgilemekte. Şeer akimiyeti kemer inşaatlarını da qurmağa planlaştıra», – dep aytıla haberde.
Rusiye kontrol etken Aqmescit yolbaşçısı Gennadiy Baharev jurnalistlerge ayttı ki, bu yerni küçük bazar noqtalarını yıqqan «Krımdorstroy» abadanlaştıracaq.
«(Demontaj ve abadanlaştıruv – QA) fiyatı iş neticelerine köre esaplanacaq. Tahminen 12 mln ruble, bundan çoq ya da az ola bile. Şimdilik er şeyni qayd etemiz. Bu belediye vazifesi belediye bücet müessisesiniñ alt añlaşmasında bar», – dep ayttı Baharev.
Aprel 11-de saba Aqmescit akimiyeti Aqmescitteki Kozlov soqağında yerleşken küçük bazarnıñ ticaret noqtalarını yıqmağa başladı.
