Link açıqlığı

«Çiygoz davasınıñ» şaatı: qabaatlanğan provokatsiya yapmadı, miting iştirakçilerini tınçlandırğan edi


Kreml kontrol etken Qırım Yuqarı mahkemesi aprel 11-de «Çiygoz davası» imayesiniñ eki şaatını sorğuğa çekti. Olardan iç biri qabaatlanğan Rusiyege qoltutqan miting iştirakçilerine qarşı zorbalıq areketlerini yapqanını tasdıqlamadı. Bunı Çiygoznıñ advokatı Nikolay Polozov toplaşuvdan soñ olğan teneffüste ayttı.

Birinci şaat, Ali Abdullayev, añlattı ki, Ukrainağa qoltutqan faaller olarnı Rusiye faallerinden ayırğan militsiya yanında olğanda «Ahtem Çiygoz insanlarnı çekilmege qandıra, qollarınen köstere, miting iştirakçilerini biraz artqa çekmege tırışqan edi. Miting iştirakçileri bunı bir de-bir çağıruv olaraq degil, tınçlandıruv olaraq köre edi. Bu tek Meclis tarafdarları añlağan ayrı işaret işaretler degil edi, adiy insan işaretleridir».

Şaat qayd etti ki, Ukrainağa qoltutqan faaller Qırım Muhtar Cumhuriyetiniñ Yuqarı Şurasına kirmege tırışmadı ve zorbalıq areketlerini yapmadı. Miting iştirakçileriniñ barışıqsever niyetlerini ekinci şaat – Sabri Ametov da – tasdıqladı.

«Şaat, miting iştirakçileri biri-birine qarşı olmadı, barışıqsever şekilde yanaşqan edi, dep ayta», – dep qoştı Polozov.

Mahkeme üyle teneffüsinden soñ şaatlarnı sorğuğa çekmege devam etecek, dep bildirdi advokat.

Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, şu cümleden «Rus Birligi» firqası, miting iştirakçilerine qarşı çıqqan edi.

Rusiye mahkemesi iyül 20-de qapalı toplaşuvda «fevral 26 işini» ekige böldi: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.

XS
SM
MD
LG