Link açıqlığı

Saatnıñ esas haberi

Ümerov ve Çiygoz Meclisni Nobel Barışıq Mukâfatına namzet köstermege çağırdılar


İlmi Ümerov, arhiv fotoresimi
İlmi Ümerov, arhiv fotoresimi

İlmi Ümerov ve Ahtem Çiygoz Ukraina halq deputatlarını Qırımtatar Milliy Meclisini 2018 senesi Nobel Barışıq Mukâfatına namzet köstermege çağırdılar. Bu aqqında Meclis reisiniñ muavinleri yapqan muracaatlarında aytıla. Vesiqanı mart 29-da Facebookta Ümerov derc etti.

«Bir çoq faal ve Meclis reberiyetiniñ özü quvulğan, apishanede yata ya da Qırımda Rusiye mahsus hızmetleriniñ daimiy nezareti altında buluna. Meclis ve onıñ tarafdarları sayesinde, taqipke baqmadan, işğalge qarşılıq kösterile ve aq-uquqları oğrunda küreş devam ete. Meclis yasağı – Rusiye Federatsiyasınıñ akimiyeti (istemese de) silâlı işğal ile küreşte onıñ rolü büyük olğanını tanığanını köstere, Qırımda bar olğan vatanperverlerni qorquzmaq ıntıluvı ola», – dep aytıla açıq mektüpte.

Müellifler Avropa ve Amerika Qoşma Ştatlarındaki ortaqlar bu teşebbüske qoltutar, dep ümüt eteler.

«Bu çağıruvnı yalıñız mukâfat olaraq degil, Meclis şübesiz oña lâyıq, Qırımnıñ azat etilmesi oğrunda küreşniñ devamı ve Ukraina topraq bütünliginiñ ğayrıdan tiklenme aleti olaraq köremiz», – dep qayd etile muracaatta.

2016 senesi aprel ayında Rusiye kontrol etken Qırım Yuqarı mahkemesi işğal altındaki yarımadada Qırımtatar Milliy Meclisiniñ faaliyetini yasaq etti. Dünya toplulığı Rusiye akimiyetiniñ areketlerine narazılıq bildirdi. Meclis imayesi Rusiye Yuqarı mahkemesine şikâyet etti, amma şikâyet arizası red etilgen сонъ Meclis faaliyeti yasaq etildi.

Ukraina İçki işler nazirligi işğal etilgen Qırımda Ukraina vatandaşlarınıñ taqip etilmesinden qasevetlengenini bildirip, basqı yapmamağa çağırdı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG