İşğal etilgen Qırımnıñ Kreml kontrol etken Yuqarı mahkemesi bazarertesi künü, mart 27-de, «Hizb ut-Tahrir davasınıñ» beş aqmescitli mabusınıñ oturışını tekrar qaldırdı. Mahkemede beş qırımtatarınıñ apis müddetleri uzatılmasından bergen şikâyet arizaları baqılacaq edi. Qabaatlanğanlar ve imayecileri şikâyet arizalarınıñ kopiyalarını vaqtında alamağanından mahkeme oturışı qaldırıldı. Bunı advokat Emil Kürbedinov mahkeme toplaşuvından soñ bildirdi.
«Qabaatlanğanlarnıñ episine şikâyet arizalarınıñ kopiyaları kelmegen eken, bugün belli oldı. Bu sebepten mart 29-da saat 10-da mahkeme mahkeme oturışını kene qaldırdı. Kopiyalarnı almağanlarğa olarnı bugün yollaycaqlar. Em advokatlarğa, em qabaatlanğanlarğa», – dep qayd etti Kürbedinov.
Onıñ bildirgenine köre, toplaşuv qabaatlanğan ve advokatlarınıñ imaye aqqına riayet etilmesi içün olarnıñ ricası ile qaldırıldı.
«Olar (qabaatlanğanlar – QA) buña dair fikirlerini aydınlatmaq kerekler. Olarğa mahkeme oturışından 10 daqqa ögüne şikâyet arizalarınıñ kopiyalarını ketirip, birden videokonferentsiyağa çıqardılar. Qabaatlanğanlar azırlanıp yetiştirmegenlerini aytıp, bu vesiqalarnen bağlı fikirleri olmağanını bildirdiler. Advokatlar da israr etti», – dep añlattı Kürbedinov.
Onıñ aytqanına köre, mahkeme oturışı qaldırılmasınıñ diger sebebi dava mabuslarından biriniñ advokatı Edem Semedlâyevniñ belli bir sebeplerden kelip olamağanı oldı.
Kreml kontrol etken Qırım Yuqarı mahkemesi mart 24-de «Hizb ut-Tahrir davasınıñ» beş mabusı boyunca oturışını qaldırdı. Teymur Abdullayev ve Rustem İsmailovnıñ imayecileri yoq edi.
Kreml kontrol etken Aqmescit Kiyev rayon mahkemesi mart 7-de «Hizb ut-Tahrir davasınıñ» beş mabusı Emil Cemadenov, Üzeir Abdullayev, Teymur Abdullayev, Ayder Saledinov ve Rustem İsmailovnıñ apis müddetini uzattı. Olar 2017 senesi iyün 11-ne qadar apiste yatacaqlar.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
