Link açıqlığı

Saatnıñ esas haberi

Kyivdeki Rusiye elçihanesi yanında Qırım işğaline qarşı narazılıq aktsiyası olıp keçti


Kyiv Rusiye elçihanesi yanındaki aktsiya, 2017 senesi mart 16 künü
Kyiv Rusiye elçihanesi yanındaki aktsiya, 2017 senesi mart 16 künü

Kyivde mart 16-da «Yaroşnıñ devlet teşebbüsi» milliy areketiniñ faalleri Rusiye elçihanesi yanında Qırım işğaline qarşı «Qırım – Ukrainadır» şiarı altında narazılıq bildirdiler. Bunı Qırım.Aqiqat mühbiri bildire.

«Yaroşnıñ devlet teşebbüsiniñ» vekili Andrey Şaraskinniñ aytqanına köre, faaller Rusiye elçihanesi yanında toplaşıp, «Rusiye Ukraina devletiniñ bir qısmını qanunsız zapt etkenini hatırlatmağa istediler».

«Bu mesele (Qırım işğali – QA) ket-kete uzatıla. Qırım meselesi bugünde-bugün pek az añıla. Buña diqqat celp etecek olamız. 21-inci asırda Avropanıñ merkezinde mustaqil bir devletniñ topraqları işğal etildi – buña baqıp indemeycekmiz. Ukraina milletçileri Qırım oğrunda küreşecek», – dedi Şaraskin.

Narazılıq aktsiyasıda umumen 10 insan bar edi. Rusiye elçihanesiniñ hadimleri faallerniñ yanına çıqmadı.

2014 senesi mart 16-da Qırımda ve Aqyar şeerinde dünyada tanılmağan referendum olıp keçti, onıñ neticelerine köre Rusiye Qırımnı öz terkibine qoştı. Ukraina, Avropa Birligi, Amerika Qoşma Ştatları bu rey berüvni tanımadı. Mart 18-de Rusiye prezidenti Vladimir Pütin Qırımnı Rusiyege «qoşulğanını» ilân etti.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG