Link açıqlığı

Frenkistan Tışqı işler nazirligi Qırımda insan aqlarınıñ vaziyeti fenalaşqanından ve yarımada Rusiye tarafından askerleştirilgeninden raatsızlanğanını bildirdi. Bu aqta Frenkistan cumhuriyetiniñ TİN beyanatında söz kete. Beyanatnı Ukrainanıñ Frenkistandaki elçisi Oleg Şamşur Twitterde paylaştı.

Beyanatta böyle keçe: «2016 senesi dekabr 19 künü BM tarafınfan qabul etilgen 71/205 rezalütsiyasına binaen, insan aqları saasında regional ve halqara nezaret aletleri, akimiyetke bağlı olmağan uquq qorçalayıcı teşkilâtlar bütün Ukrainağa, şu cümleden Qırım ve Aqyarğa maniasız keçe bilecekleri ğayet muim. Frenkistan, halqara uquq qaidelerine zıt şekilde tutulğan bütün adamlarnıñ azat etilmesini talap ete».

Frenkistan Tİ Nazirligi, halqara seviyede qabul etilgen sıñırlar çerçivesinde Ukrainanıñ mustaqilligi ve topraq bütünligi ğayrıdan tiklenmesi içün qattı niyette olğanını bildirdi.

İşğalden soñ Qırımda mustaqil mühbirlerde, qırımtatar faallerinde ve Meclis azalarında kütleviy tintüvler sıq-sıq keçirilip başladı. Ukraina Tışqı işler nazirligi (TİN) işğal etilgen Qırımda ukrain vatandaşlarınıñ taqip etilmesinden qasevet çekkenini bildirdi ve basqıncılıqnı toqtatmağa çağırdı. TİN halqara toplulıqqa muracaat etip, Rusiye insan aqları ve ifade serbestligini bozmasın, ukrain siyasiy mabusları ve esirlerini azat etsin dep, oña qarşı bütün uquqiy ve siyasiy basqı usullarını qullansın istedi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG