Link açıqlığı

BMT İnsan aqları Şurasında Qırımdaki vaziyet aqqında söz yürsetecekler


Fevral 27 – mart 3 künleri Cenevrede keçecek BMT İnsan aqları Şurasınıñ 34-ci toplaşuvında Ukraina parlament vekilleri zapt etilgen Qırımda insan aqlarınıñ vaziyeti mezakere etmek içün tedbir keçirmege azırlanalar. Bunı Facebookta Ukraina Haber siyaseti nazirniñ birinci muavini Emine Ceppar haber etti.

Emine Ceppar: «Cemidan vesiqalarnen tolu! Qırım aqqında çetel oquyıcığa Qırımlı jurnalislerniñ taririnde ve «Territoriya Krım» mecmuasınıñ yardımı ile azırlanğan Qrım uydurmalar antologiyasından ğayrı, Qırım İnsan aqları taqımı ve Qırımtatar Maaliy Merkeziniñ esabat ve malümatlarını alıp ketem», – dep yazdı.

O yazdı ki, tedbirniñ iştirakçileri arasında Avropa Şurasınıñ Baş kâtibi Thorbjorn Jagland, BMT Yüksek komissarnıñ müavini Flavia Pansieri, Latviya (Edgar Rinkevich), Litva (Linas Linkevicius), Ukraina (Pavlo Klimkin) tışqı işler nazirileri olacaq. Körüşüvge Ukraina Parlament yolbaşçısınıñ birinci müavini İrina Geraşenko ve Qırımtatar Milliy Meclis reisi Refat Çubarov kelmege niyetliler.

Qırım Rusiye nezaretine keçkeninen FSB yarımadada muntazam surette tintüvler keçire, jurnalist, faaller, cemaat erbapları sorğulana, qırımtatar vatandaşları yaqalana. Uquq qorçalayıcılar bunı «farqlı fikirlerge qarşı küreş» kibi köreler.

Avropa ve Avropa-Atlantik bütünleşme boyunca suallaerde Ukraina Baş naziriniñ muavini İvanna Klimpuş-Tsintsandzeniñ malümatına köre, fevral 25 kününe itibaren Qırımda işğalden başlap 12 insan vefat etti, 17 insan ğayıp oldı, 39 siyasiy mabusı oldı, olardan 10 mahkeme cezasını aldı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG