Fevral 21 künü Kreml nezaretindeki Aqmescitniñ Kiyev rayon mahkemesinde alınğan qararğa binaen, Boğurça qasabasında yaqalanğan Marlen Mustafayevke 11 kün apis cezası berildi. Bunı Qırım.Aqiqatqa Radio Svoboda muhbiri bildire.
Mustafayevniñ işi baqılğanda, içtimaiy sitelerde qaldırğan yazılarğa qıymet kesken ekspertini sorğulamaq muracatı red etildi. Ondan da ğayrı mahkemeci Vikrot Mojelânskiy mahkeme toplaşuvında prokurornıñ iştirak etmesini ve işniñ vesiqalarını baqmaq muracaatını red etti.
Mahkme toplaşuvında «E» merkeziniñ hadimi Ruslan Şambazovnı sorğuladılar, o Qırımlı advokat Emil Kurbedinovnıñ işinde de iştirak etken edi.
Mahkeme toplaşuvına jurnalistlerni yibermediler.
Mustafayevni Memuriy qanun bozuvları Kodeksiniñ 20.3 maddesi (Natsist timsalleriniñ teşviqatı ve açıq numayışı) boyunca qabaatlaylâr. Buña sebep – 2014 senesi iyül ayında «Vkontakte» ağında Hizb ut-Tahrir teşkilâtınıñ timsalinen beraber yerleştirilgen yazı oldı.
Marlen Mustafayevniñ advokatı Emil Kurbedinov olacaq.
Qırımda, Aqmescitniñ Boğurça qasabasında, fevral 21 künü saba, Rusiyeniñ silâlı hızmetleri, Marlen Mustafayevniñ evinde tintüv ötkerdiler.
Marlen Mustafayevni desteklemek içün kelgen 10 insandan ziyade yaqalanğanı aqqında haber etilgen edi. İnsanlarnı yaqalamazdan ögne, politsiya hadimleri megafondan toplaşqanlar kütleviy tetbirler aqqında qanunnı bozğanlarını seslendirdiler.
Rusiye silâlı hızmetleri Boğurçada ötkergen areketlerini izaatsiz qaldıralar.
Ukraina Tışqı işler nazirligi defalarca zapt etilgen Qırımda Ukraina vatandaşlarına qarşı basqı ve taqip areketleri yapılğanınen raatsız olğanını bildire edi, ondan da ğayrı Rusiyeni yerli sakinlerge basqını toqtatqanını ve ukrainalı siyasiy mabuslarını azat etilmege çağıra edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
