Link açıqlığı

İlmi Umerov Qırımda yaqalınuv ve tintüvler «cemaatnı qorqutmaq içğün yapılğan aktsiya» dep adlandırdı


Qırımtatar Milliy Meclis reisiniñ muavini İlmi Umerov yarımadada fevral 21 künü yapılğan yaqalav ve tintüvlerini «cemaatnı qorqutmaq içğün yapılğan aktsiya» dep adlandırdı ve qırımlılarnı birleşmege ve bir birine qol tutmağa çağırdı. Bunı Umerov fevral 21 künü, Aqmescitte Boğurça qasabasında Marlen Mustafayevniñ evinde tintüv ötkerilgen soñ, Facebookta izaatlap yazdı.

İlmi Umerov: «Kene Qırımda ağır bir kün. Bir tek tintilgen eviniñ saibi yaqalanmadı, oña destek köstermek içün kelgenlerniñ de bazılarını yaqaladılar. Maqsat aynı qala – er kesni qorqutmaq ve qorquda tutmaq. Cemaatnı qorqutmaq içün yapılğan aktsiyası devam ete... Zapt etilgen Qırımda yaşap, daa qaviy birleşmege kerek... Birilerinde tintüv, mahkeme, yaqalav, apiske alınuv ya da buna oşağan bir şey olğanını eşitseñiz – destek köstermek içün keliñiz... Qırımtatar halqınıñ öz aqları içün zorbalıqsız küreşi yañı şaraitlerde devam ete – işğal altında ve uquqsız adaletsizlikte», – dep yazdı.

Qırımda, Aqmescitniñ Boğurça qasabasında, fevral 21 künü saba, Rusiyeniñ silâlı hızmetleri, Marlen Mustafayevniñ evinde tintüv ötkerdi.

Bunen beraber Marlen Mustafayevni desteklemek içün kelgen insanlardan da 10-den ziyadesi yaqalandı. İnsanlarnı yaqalamazdan ögüne, politsiya hadimleri megafon vastasınen, toplaşqanlar kütleviy merasimler aqqında qanunlarını bozğanlarını ilân ettiler.

Rusiye silâlı hızmetleri Boğurçada ötkergen areketlerini izaatsiz qaldıralar.

Ukraina Tışqı işler nazirligi defalarca zapt etilgen Qırımda Ukraina vatandaşlarına qarşı basqı ve taqip areketleri yapılğanınen raatsız olğanını bildire edi, ondan da ğayrı Rusiyeni yerli sakinlerge basqını toqtatqanını ve ukrainalı siyasiy mabuslarını azat etilmege çağıra edi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG