Link açıqlığı

Kreml kontrol etken Qırım Yuqarı mahkemesinde fevral 14-de advokat Nikolay Polozovnıñ «Ümerov işinde» şaat olaraq yaqalavı ve sorğuğa çekilmesinden bergen şikâyet arizası baqıla. Bunı Radio Svoboda jurnalisti haber ete.

Jurnalistniñ bildirgenine köre, Aqmescitniñ Kiyev rayon mahkemesi 2016 senesi dekabr 13-de Rusiye FSB taqiqatçısı İgor Skripkanıñ muracaatını qanaatlendirip, advokat Nikolay Polozovnı «vazifesini yapqanda alğan malümatlar aqqında» sorğuğa çekmege izin berdi.

Taqiqatçı Rusiye topraq bütünligini bozmaq çağıruv yapması ile qabaatlanğan Qırımtatar Milliy Meclisiniñ reis muavini İlmi Ümerovnıñ işinen bağlı sorğu keçirilmesini talap etken edi. Bes-belli, taqiqatçı Polozovnı şaatqa çevirip, Ümerovnıñ imayecileri statusından çıqarmağa tırışqandır.

Yanvar 25-de Rusiye Federal havfsızlıq hızmetiniñ altı hadimi Polozovnı Aqmescitniñ Serov soqağındaki musafirhane yanında yaqalap, onı sorğuğa alıp kettiler. Advokat bunı qaçıruv olaraq tanıp, advokatlar toplulığını bu areketlerge cevap bermege çağıra.

Dekabr 20-de Qırımda advokat Nikolay Polozovğa qarşı cinaiy iş ğayrıdan açıldı. Uquq qorçalayıcılar Rusiye uquq qoruyıcı sistemasınıñ bu areketleri Polozovnı «fevral 26 davasınıñ» imayesinden ayırmaq içün yapıla, dep tüşüne.

Rusiyeniñ Qırım işğalinden soñ qırımtatarlar yarımadada Rusiye akimiyetini tanımadı. Böylece, Qırımnıñ şimdiki akimiyeti ve uquq qoruyıcıları olarğa qarşı basqı yapmağa başladılar. Dünya toplulığı Qırımda insan aqlarını qorçalamağa çağıra, Rusiyeden ise yarımadada insan aqlarına riayet etmesini talap ete. Qırımda bir sıra mahkeme esnası keçirile, tintüv ve apis cezaları devam ete. Uquq qorçalayıcılar Rusiye akimiyetiniñ Qırımda yapqanları «siyasetnen bağlıdır» deyler.

Qırımda bir sıra mahkeme davası devam ete, qırımtatar halqınıñ temsilcileri yaqalana, evlerinde tintüvler keçirile. Qırımdaki Rusiye akimiyetiniñ bu yapqanlarını uquq qorçalayıcılar «siyasiy sebeplernen» bağlay.

XS
SM
MD
LG