Link açıqlığı

Saatnıñ esas haberi

Qırımda «Umerovnıñ işi» boyunca Polozovnıñ sorğuğa celp etilmesi aqqında apellâtsiya tainlendi


Nikolay Polozov
Nikolay Polozov

Fevral 14, salı künü Kremlge bağlı Qrım Yuqarı Mahkemesinde Nikolay Polozovnıñ FSB taqiqatçısı tarafından «Umerovnıñ işine» şaat olaraq celp etilgeni sebebinden şikâyet arizası baqılacaq. Bunı Polozov fevral 13, bazarertesi künü Facebookta birdirdi.

O dey ki: «Adliyeci içün advokat sırı Rusiye Esas qanunda, ve, meselâ, advokat faatiyetinen bağlı qanunnıñ 8 maddesi ve Rusiye Federatsiyasınıñ Cinaiy kodeksniñ 56 maddesi kibi mahsus qanunlarnen qorçalanğanı bes-belli. Advokat müşterisine adliyeviy yardım köstergeni bağlı malümat aqqına sorğulanmaz. Albu ki, hatırlatırım, aynı bu mesele FSB taqiqatçısını meraqlandırğan edi».

Polozov qayd etti ki, mahkemeci Mojelânskiyniñ qararı qanuniy küç alacağını beklemeden onı mecburen idarege ketirmege ya da protsesual areketlerni yapmağa FSB hadimleriniñ aqları yoq edi.

«Appelâtsıya mahkemesi de Mojelânskiyniñ mahkeme qararınen razı olsa edi, ancaq bundan soñ FSB taqiqatçısı Skripka bunı yapa bilir edi. Söz sırası, iç bir normal mahkeme advokat sırı aqqında advokat sorğusını keçirmek istegini qanuniy olaraq qabul etmez edi», – dep qoştı advokat.

Yanvar 25-de Rusiye Federal havfsızlıq hızmetiniñ altı hadimi Polozovnı Aqmescitniñ Serov soqağındaki musafirhane yanında yaqalap, onı sorğuğa alıp kettiler. Advokat bunı qaçıruv olaraq tanıp, advokatlar toplulığını bu areketlerge cevap bermege çağıra.

Dekabr 20-de Qırımda advokat Nikolay Polozovğa qarşı cinaiy iş ğayrıdan açıldı. Uquq qorçalayıcılar Rusiye uquq qoruyıcı sistemasınıñ bu areketleri Polozovnı «fevral 26 davasınıñ» imayesinden ayırmaq içün yapıla, dep tüşüne.

Rusiyeniñ Qırım işğalinden soñ qırımtatarlar yarımadada Rusiye akimiyetini tanımadı. Böylece, Qırımnıñ şimdiki akimiyeti ve uquq qoruyıcıları olarğa qarşı basqı yapmağa başladılar. Dünya toplulığı Qırımda insan aqlarını qorçalamağa çağıra, Rusiyeden ise yarımadada insan aqlarına riayet etmesini talap ete. Qırımda bir sıra mahkeme esnası keçirile, tintüv ve apis cezaları devam ete. Uquq qorçalayıcılar Rusiye akimiyetiniñ Qırımda yapqanları «siyasetnen bağlıdır» deyler.

Qırımda bir sıra mahkeme davası devam ete, qırımtatar halqınıñ temsilcileri yaqalana, evlerinde tintüvler keçirile. Qırımdaki Rusiye akimiyetiniñ bu yapqanlarını uquq qorçalayıcılar «siyasiy sebeplernen» bağlay.

XS
SM
MD
LG