Fevral 26, bazar künü Kyivde Qırım ile Birdemlik Yürüşi ötkerilecek. Bunı Qırımtatar Milliy Meclis reisi Refat Çubarov fedral 10 künü öz Facebook saifesinde haber etti.
Refat Çubarov: «Qırım işğaline qarşı çıquv Kününde Kyivde qırımtatar halqı ile, ukrain halqı ile, ve öz toprağında yaşap Rusiyeli işğalcilerniñ esarite oğrağan bütün halqalar ile Birdemlik Yürüşi ötkerilecek. Yürüşniñ esas şiarı – «Rusiyeli işğalci Ukrainanıñ Qırımından yoq olsun», – dep bildirdi.
Onıñ sözlerine köre, Yürüşni Qırımtatar Milliy Meclisi ve bir sıra cemaat ve gençler teşkilâtları teşkil etecek.
Birdemlik Yürüşiniñ iştirakçileri Kök yüzü (Nebesnaya sotnâ) Qaramanlarınıñ alleyasında, «Ukraina» musafirhanesi qarşısında toplaşaq. Birdemlik Yrüşiniñ iştirakçileri saat 13.00 – 14.00 aralarında toplaşıp, saat 14.00 yürüşni başlaycaqlar, dep qayd etti Milliy Meclis reisi.
Birdemlik Yürüşiniñ yolu böyledir: Kök yüzü Qaramanlarınıñ alleyası, İnstitutskaya soqağı, Şelkoviçnaya soq., Gruşevskogo soq., Avropa meydanı, Hreşçatik soq.. Yürüş Mustaqillik meydanında toqtaycaq, ve anda saat 15.00 ve 15.45 arasında miting ötkerilecek.
Refat Çubarovnıñ sözlerine köre, Birdemlik Yürüşiniñ simvolları – Ukraina devlet bayrağı, qırımtatar milliy bayrağı, Qırımlı siyasiy mabuslarnıñ, taqip etilgenlerniñ, esir etilgen ve öldürülgenlerniñ suretleri olacaq.
Qırım işğaline qarşı çıquv Künü fevral 26 künü qayd etile. O künü Qırım Yuqarı Radasınıñ binası ögünde Ukraina topraq bütünligine qoltutuv mitingi keçirilgen edi. O vaqıt Rusiye tarafını tutqan, bu cümleden «Russkoye Yedinstvo» («Rus Birligi») firqası, miting iştirakçilerine qarşı çıqtı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
