Zapt etilgen Qırımda fevral 8, çarşenbe kününiñ aqşamına qadar 35 meskün yer ve 7 binden ziyade insan elektriksiz qala. Bunı işğal etilgen Qırımdaki Rusiye Fevqulâde vaziyetler nazirliginiñ baş idare matbuat hızmeti bildire.
RİA Krım agentligine izaatlap, FVN: «Saat 17:00 olğan vaziyetke köre, 35 meskün yerde elektik berilüvi toqtalğan, olardan 6 – qısmen. Umumen 7185 insan elektriksiz qalmaqta. Elektrik berilüvini tüzetmek içün 64 RES taqımı, yani 197 insan, 69 tehnika maşnası çalışmaqta», – dep bildirdi.
Müessisede, elektrik ağlarınıñ qazalanması avanıñ bozulmasınen bağlaylar, aytalr ki, ayazlı ava ve küçlü yel buña sebep oldı.
Bundan evel «Krımenergo» yarımadada 30 meskün yerde elektrik olmağanını bildire edi.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
Rusiye 2016 senesi baarde energetik köpürniñ üçünci ağını qoşqan olsa da, işğal etilgen Qırımda elektrik temin etüvinde problemler bar. 2015 senesi dekabr ayından başlap, Herson vilâyetinde elektrik direkleriniñ bozulmasından sebep, Qırımğa qıtaiy Ukrainadan elektrik aqımı toqtatıldı. Şimdiki vaqıtta Qırım özü çıqarğan energiya, Rusiyeden yarımadağa ketirilgen generator ve Rusiyeniñ Krasnodar vilâyetinden keçirilgen energo köpür ile elektriknen temin etile.
