Link açıqlığı

Qırımda mahkeme Ahtem Çiygoznı apiste qaldırdı – advokat


Qırımdaki siyasiy mabuslarğa destek aktsiyası, Kyiv, 26 avgust 2016 senesi

Fevral 6 künü mahkeme toplaşuvı devamında Kreml kontrolündeki Qırım Yuqarı mahkemesi, Qırımtatar Milliy Meclis reisiniñ muavini Ahtem Çiygozğa qarşı toqtatuv tedbirini deñişmesiz qaldırmağa qarar aldı. Bunı advokat Nikolay Polozov Twitterde haber etti.

Adliyeci: «O yerde muşavere keçirip, mahkemeciler Ahtem Çiygoznı apiste qaldırmağa qarar aldılar. Vaziyet deñişmedi, deyler», – dep qayd etti.

Polozov dey ki, bu sefer imayeciler, «ögrenilgen maddiy deliller ve şaatlarnıñ ifadeleri arasında Çiygoznıñ qabaatını isbatlağan delil olmağanı sebebinden» apis cezasını deñiştirmege rica etken ediler.

Mahkemede 2014 senesi 26 fevralde yüz bergen adiseler vaqıtında qayd etilgen videolarnı talil etmege devam ettiler.

Mahkeme oturışınıñ birinci yarısı yekünlengen soñ Polozov öz video-muracaatında: «Kösterilgen kadrlarda bizler kütleviy nizamsızlıqnıñ teşkil etilmesine yöñelgen Çiygoznıñ areketlerini körmeymiz», – dep ayttı.

Ve bu endi «Çiygoznıñ işi» boyunca 75-ci mahkeme toplaşuvı olğanını dedi.

Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Rus Birligi» firqası, miting iştirakçilerine qarşı çıqtı.

Rusiye mahkemesi «Çiygoznıñ işini» «fevlral 26 işi» çerçivesinde alıp bara, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.

XS
SM
MD
LG