Link açıqlığı

Qırımtatar cumhuriyetiniñ Anayasası içün Ukraina qanunları deñiştirilmeli – Bariyev


Eskender Bariyev, Qırımtatar Milliy Meclisiniñ azası

«Maydan inostrannıh del» fondu fevral 1-de «Ukrainanıñ Qırımtatar Muhtar Cumhuriyeti Anayasasınıñ» leyhasını taqdim etti. Qırımtatar Milliy Meclisiniñ azası Eskender Bariyevniñ aytqanına köre, bu ğaye ekspertler ve cemaat muzakereleriniñ başlaması içün güzel bir adım ola bile. Faqat, onıñ fikirince, vesiqa leyhasını azırlamaqtan evel Ukrainanıñ bir sıra qanunına deñişme kirsetilmeli.

«Anayasağa qadar kelmezden evel deñişme kirsetilecek bir sıra qanunğa emiyet bermelidir. Hususan, Qırım Muhtar Cumhuriyeti qanunı, Ukraina Anayasasınıñ da deñişmelerini tüşünmek kerek. Amma ilk evelâ tamır halqlar qanunı qabul etilmeli», – dep ayttı Bariyev Qırım.Aqiqatqa fevral 2-de.

Onıñ bildirgenine köre, Anayasa leyhası azırlanğanda büyük emiyet «şekline degil, mündericesine» berilmelidir. Bariyevniñ zanınca, vesiqa metninde «qırımtatar halqı inkişafınıñ kefilleri» qayd etilmeli. Taqdim etilgen leyhada böyle bir kefil yoq, dep qayd etti o.

«Qırımtatarlar ve diger halqlarnıñ aq-uquqları nasıl etip kefil etilecegini tam olaraq yazmaq kerekmiz. Menim fikirimce, işbu metinde bu yetişmey. Amma añlaşıla ki, «Maydan inostrannıh del» taqımı birinci adım atıp, bu meseleni köterdi. İlk teessurat – şimdiki Anayasadan pek farqlı olmağan metin, yalıñız Qırımtatar Muhtar Cumhuriyeti ıstılası peyda ola», – dep qoştı Qırımtatar Milliy Meclisiniñ azası.

Bariyev al-azırda ğayege qoltutmaq ve onı inkişaf ettirmek içün ekspertlerniñ ğayelerini birleştirmek kerek, dep ayta.

«Maydan inostrannıh del» fondunıñ Ukrainanıñ Qırımtatar Muhtar Cumhuriyeti Anayasasınıñ leyhası qapalı körüşüvde taqdim etildi. Fondnıñ bildirgenine köre, tedbirde ukrain ekspertleri, akimiyetniñ devlet organları ve Qırımtatar Milliy Meclisiniñ vekilleri iştirak etti. Vesiqa leyhası rusça azırlanıp, 48 maddeden ve beş qısımdan ibarettir.

Vesiqa leyhasınıñ müellifi «Maydan inostrannıh del» fondunıñ eksperti Yuriy Smelânskiy oldı.

O, Qırım.Aqiqatqa öz baqışını aydınlatmaqtan vazgeçti.

2014 senesi mart 20-de Yuqarı Rada qırımtatarlarnı Qırımnıñ tamır halqı olaraq tanıdı. Bu qararğa 283 deputat qoltutqan edi.

Ukraina qırımtatarlarnıñ tamır halqı olaraq etnik, medeniyet, til ve din hususiyetleriniñ saqlap qalması ve inkişafını kefil etmege vade etti.

Sentâbr 22-de Yuqarı Rada prezidentke Ukraina Anayasasında Qırımnıñ statusını deñiştirip, territorial degil de, Qırımtatar milliy cumhuriyetini yapmağa tevsiye etti.

XS
SM
MD
LG