Adliyeci Nikolay Polozov fevral 2 künü, Qırımtatar Milliy Meclis reisiniñ muavini Ahtem Çiygoznıñ işi boyunca mahkeme toplaşuvında esas şaatlardan biri sorğudan keçkenini bildirdi. Bunı Polozov Qırım.Aqiqatqa bergen izaatında beyan etti.
Advokat: «Bügün esas şaatlardan biri olğan – Enver Arpatlı (Aluşta şeer yolbaşçısınıñ sabıq muavini – QA) sorğudan keçti. Bundan evel, biz video-yazılarnı seir etkende, o mezkür vaqialarda bayağı faal surette iştirak etkenini körgen edik. Bundan da ğayrı o, mitingniñ keçirilmesi aqqında qarar qabul etilgen Meclis toplaşuvınıñ ketişatı aqqında da malümat berdi. Şaat Arpatlı – qabaatlayıcı tarafnıñ şaatı olaraq davet etilgen olsa da – onıñ ifadeleri, elbette, qabaat iddiasını boza», – dep ayttı.
«Onıñ aytqan birinci şeyi – Meclis toplaşuvında kütleviy nizamsızlıq aqqında cinaiy planlar azırlanılmağanı edi, ve bu, tabiiy ki, gizli şaat Petrovnıñ ifadelerine ters kele. Ekinciden, o pek müim şey ayttı. Qabaatlayıcı tarafnıñ fikirine köre, uzun vaqıt devamında Çiygoz çeşit türlü miting ve merasimlerniñ teşkilâtçısı edi. Muqayese olaraq, 26 fevral künü de mitingni o teşkil etmek kerek edi. Lâkin 2013 senesi yañıdan saylavlar keçirilgen edi ve vazifeler deñişken edi. Bundan soñ mitinglerni Zaur Smirnov teşkil ete edi. Ve şaat bunı ayttı», – dedi o.
Bundan evel Polozov, Kreml tarafından tain etilgen Qırım yolbaşçısı Sergey Aksönov, mahkemede Ahtem Çiygoznıñ işi boyunca şaat olaraq sözge çıqıp, nizamsızlıqnıñ teşkil etilmesinde Çiygoznıñ rolü ne olğanını aytıp olamağan edi.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Rus Birligi» firqası, miting iştirakçilerine qarşı çıqtı.
Rusiye mahkemesi «Çiygoznıñ işini» «fevlral 26 işi» çerçivesinde alıp bara, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
