Rusiye advokatı Nikolay Polozov Kreml kontrol etken Aqmescitniñ Kiyev rayon mahkemesi taqiqatçığa advokatnı sorğuğa çekmege bergen izniniñ lâğu etilmesini bekley. Bunı Polozov Qırım.Aqiqatqa aydınlattı.
«Kiyev rayon mahkemesiniñ qararı lâğu etilecegini bekley, çünki işbu qarar Rusiye qanunlarına zıt kele. Bunıñnen beraber, bu şikâyet arizası misalinde Qırım mahkeme sisteması uquq qoruyıcı organlarınıñ «isteklerine» ne qadar bağlı olğanını añlarmız», – dep ayttı Polozov.
Advokat mahkeme qararı deñişmeyip qalsa, Rusiye Yuqarı Mahkemesine şikâyet etilecek, dep ayta.
«Bu instantsiyadan keçmemiz Avropa insan aqları mahkemesine muracaat etmege imkân bere, anda ise Qırım mahkemecileri ve taqiqatçılarınıñ yapqanlarına mustaqil şekilde qıymet kesilecektir», – dep qayd etti Polozov.
Advokat Aqmescitniñ Kiyev rayon mahkemesine «FSB taqiqatçısınıñ qanunsız areketlerinden» şikâyet etti ve Rusiye ombudsmeni Tatyana Moskalkovağa ariza berdi.
Yanvar 30-da saba haber etilgenine köre, işğal etilgen Qırımnıñ Yuqarı mahkemesi Rusiye advokatı Nikolay Polozovnıñ şikâyet arizasını baqacaqtır. Toplaşuv fevral 14-de ötkerilecektir.
Yanvar 27-de Polozov Federal advokatlar palatası ve Moskvanıñ Advokatlar palatasına «Rusiye FSB hadimleriniñ qanunsız areketlerinden» sebep ariza berdi.
Yanvar 25-de Rusiye Federal havfsızlıq hızmetiniñ altı hadimi Polozovnı Aqmescitniñ Serov soqağındaki musafirhane yanında yaqalap, onı sorğuğa alıp kettiler. Advokat bunı qaçıruv olaraq tanıp, advokatlar toplulığını bu areketlerge cevap bermege çağıra.
Dekabr 20-de Qırımda advokat Nikolay Polozovğa qarşı cinaiy iş ğayrıdan açıldı. Uquq qorçalayıcılar Rusiye uquq qoruyıcı sistemasınıñ bu areketleri Polozovnı «fevral 26 davasınıñ» imayesinden ayırmaq içün yapıla, dep tüşüne.
Rusiyeniñ Qırım işğalinden soñ qırımtatarlar yarımadada Rusiye akimiyetini tanımadı. Böylece, Qırımnıñ şimdiki akimiyeti ve uquq qoruyıcıları olarğa qarşı basqı yapmağa başladılar. Dünya toplulığı Qırımda insan aqlarını qorçalamağa çağıra, Rusiyeden ise yarımadada insan aqlarına riayet etmesini talap ete. Qırımda bir sıra mahkeme esnası keçirile, tintüv ve apis cezaları devam ete. Uquq qorçalayıcılar Rusiye akimiyetiniñ Qırımda yapqanları «siyasetnen bağlıdır» deyler.
Qırımda bir sıra mahkeme davası devam ete, qırımtatar halqınıñ temsilcileri yaqalana, evlerinde tintüvler keçirile. Qırımdaki Rusiye akimiyetiniñ bu yapqanlarını uquq qorçalayıcılar «siyasiy sebeplernen» bağlay.
