Link açıqlığı

Polozov: 2017 senesi qırımtatarlarğa qarşı daa büyük zulum yapılacağını beklemelimiz


Nikolay Polozov

2017 senesi qırımtatar faallerine qarşı yañı cinaiy işler açılacağını beklemek kerekmiz. Bunı Rusiyeli advokat Nikolay Polozov DW intervyüsinda beyan etti.

Onıñ sözlerine köre, 2018 senesiniñ prezident saylâvlarına azırlanmaqnen, Rusiye ükümeti Qırımtatar Milliy Meclisiniñ qalğan faaliyetini yoq etmege tırışacaq, dep yaza neşiriyat.

«Men, Rusiyede ekstrimistik teşkilât olaraq tanılğan Mecliske bağlı bir qaç cinaiy iş açılacağını tahmin etem. Birincilerden – İlmi Umerov olacaqtır, dep belleyim», – tarif etti Polozov.

Advokat bu intervyüda qayd etti ki, basqılar – işğal etilgen Qırımda keçken sene ötkerilgen parlament saylâvlarınıñ neticeleri sebebinden şiddetleşmek mümkün.

«Kreml ve yerli memurlar, saylâvlarğa kelgenlerniñ sayısı ğayet az olğanından ve saylâv neticelerinden, hususan, qırımtatarlar şu saylâvlarğa kütleviy şekilde qoşulmağanından, menmün degiller. Vaziyetini deñiştirmek ve saylâvlarğa sayısını güzelleştirmek ve yahşı neticelerni elde etmek vazifesi qoyıldı. Bunı becermek içün qırımtatar teşkilâtlarına qarşı küreş alıp barılacaq», – dep añlattı Polozov.

Yanvar 26 künü Bağçasarayda qırımtatar faali Seyran Saliyevniñ evinde tintüv ötkerildi, soy-soplarınıñ aytqanlarına köre, silâlı hızmetler yasaq etilgen kitaplarnı qıdırdılar. Saliyevni Rusiye İçki işler nazirliginiñ Bağçasaraydaki ROVD binasına alıp kettiler.

Aynı şu künü Edem Semedlâev ve Emil Kurbedinovnıñ qullanğan maşnalarını Rusiye yol nezaret hızmetiniñ vekilleri toqtattı, birazdan o yerge FSB hadimleri kelip Kurbedinovnı yaqaladılar. Advokatnı «ekstremistik malümatlarnıñ tarqatılmasında» qabaatlaylar, oña qarşı ceza qararı Kreml kontrolündeki Aqmescitniñ Demryol rayon mahkemesinde qabul etilecegi belli oldı.

Bundan ğayrı adliyeciniñ evi ve ofisinde tintüv yapılğanı aqqında bildirile edi.

Emil Kurbedinov «Hizb ut-Tahrir işi» boyunca bir-qaç mahkümniñ ve jurnalist Nikolay Semenanıñ advokatı ola.

Keçende Aqmescitte FSB hadimleri, İlmi Umerov ve Ahtem Çiygoznıñ işlerinde advokat olğan Nikolay Polozovnı yaqalap, sorğuğa alğan ediler. Polozov bu yaqalamanı qaçıruv olaraq tanıy.

XS
SM
MD
LG