Link açıqlığı

Bağçasarayda yaqalanğan Seyran Saliyevniñ soy-sopı tintüvniñ tafsilâtını tarif etti


Tasviriy resim

Yanvar 26 künü evinde tintüv keçirilgen Seyran Saliyevniñ soy-sopları adiselerniñ tafsilâtını tafidledi.

«Qararnameni bizge köstermediler, o (FSB hadimi – QA) soñunda dedi ki, olar onı alıp ketecekler, er şey normal olacaq», – dep aytalar aqrabalar, Fecabookta Server Mustafayevniñ yayınlağan video qaydnda.

Tuvğanlarnıñ sözlerine köre, silâlı hızmetler Saliyevten onıñ «Vkontakte» saifesi aqqında soraştırıp, onıñ IŞİD ile alâqasını ögrenmege isteyler.

«Bütün dolapnı qarıştırıp baqtılar, «Musulmannıñ qalesi» («Krepost musulmanina») kitabını qıdırdılar. Silâlı adamlardan biri dedi ki, IŞİD ile iç bir alâqa tapılmasa, Hizb ut-Tahrir ile alâqasını qıdıracaqlar», – dediler soy-sopları.

Bundan ögüne qırımtatarı Seyran Saliyevniñ evinde yanvar 26 künü tintüv keçirilgeni belli oldı. Onı yaalap, Bağçasaraydaki ROVD binasına alıp kettiler.

Saliyevniñ advokatı Emil Kurbedinov ta 26 yanvarde, Bağçasaraydaki tintüvge yol alğanda, FSB hadimleri tarafından yaqalandı.

Advokatnıñ ofisi ve evinde de tintüv keçirildi.

Emil Kurbedinov «Hizb ut-Tahrir işi» boyunca bir-qaç mahkümniñ ve jurnalist Nikolay Semenanıñ advokatı ola.

Rusiyeniñ Qırım işğalinden soñ qırımtatarlar yarımadada Rusiye akimiyetini tanımadı. Böylece, Qırımnıñ şimdiki akimiyeti ve uquq qoruyıcıları olarğa qarşı basqı yapmağa başladılar. Dünya toplulığı Qırımda insan aqlarını qorçalamağa çağıra, Rusiyeden ise yarımadada insan aqlarına riayet etmesini talap ete.

Qırımda bir sıra mahkeme esnası keçirile, tintüv ve apis cezaları devam ete. Uquq qorçalayıcılar Rusiye akimiyetiniñ Qırımda yapqanları «siyasetnen bağlıdır» deyler.

XS
SM
MD
LG