Tavriya gumanitar platforması, mejburen köçip kelgenlerniñ birligi ve diger cemaat teşkilâtları er yıl avgust 28-de Rusiye tarafından ayırımğa oğrağan Qırımdaki etnik ukrainlerniñ aq-uquqlarını qorçalav kününi keçirmege teklif eteler.
Bunı Kyivde «Bizim Qırım: ukrain yarımadasınıñ Rusiye ile bağlı olmağan ikâyeleri» kitabınıñ taqdim merasiminde onıñ müelliflerinden biri, Tavriya gumanitar platformasınıñ koordinatorı Andrey İvanets bildirdi.
Onıñ aytqanına köre, bu kün 1917 senesi avgust 27-29 künleri Tavriya ukrainleriniñ qurultayı ve 1918 senesi avgust 28-29 künleri Qırım ukrainleriniñ qurultayınen bağlıdır.
«Rusiyeniñ ayırım siyaseti Qırımdaki ukrainlerni assimilâtsiyağa oğratmaq içün yapıla, çünki Ukrain cemiyetiniñ aq-uquqlarını qorçalav kününde onıñ vaziyetini, onı qorçalaycaq tedbirlerniñ semereligini hatırlamaq kerek, ukrain ve dünya toplulıqlarınıñ problemlerine diqqat celp etmek kerektir», – dep tüşüne İvanets.
Bu kün, onıñ zanınca, bayram degil, Qırımdaki ukrainlerniñ problemleri al etilecek vaqıt olmalıdır.
Tavriya gumanitar platformasınıñ koordinatorı qayd etti ki, yarımadanıñ Rusiye akimiyeti Qırımda Ukraina vatandaşlarınıñ, millet mensüpligine baqmadan, aq-uquqları ve serbestligini boza. BMT, Avropa Şurası, OSCE, diger halqara teşkilât ve ekspertlerniñ malümatına köre, yarımadada eñ küçlü ayırımğa qırımtatar halqı ve etnik ukrainler oğray. Olarnı ukrain haber, tasil ve gumanitar boşluğından ayıralar, Qırımda ukrain tilli tasil sistesı, ukrain tilli kütleviy haber vastaları yoq etile, ukrain teşkilâtları ve firqaları yasaq etile, ukrain faallerine qarşı repressiyalar yapıla.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
